星期日凌晨睇波，蘇格蘭對意大利打得十分燦爛，場波好好睇，結果幸運之神眷顧意大利，打破「十七不吉」嘅迷信，完場前頂入一球，以二比一險勝蘇格蘭，與法國攜手進入歐洲盃決賽圈。踢波係要有運嘅，賽前格拉斯哥天氣好差，溫度急降，天下大雨，蘇格蘭球迷話上帝站在蘇格蘭一方，來自歐洲南部嘅意大利球員會唔習慣呢種天氣，踢唔出水準。辛康納利係最著名嘅蘇格蘭明星，賽前向蘇格蘭隊發信，鼓勵佢哋拚命為蘇格蘭爭光。辛康納利封短信究竟講啲乜，領隊麥利殊話係占士邦最高機密，唔肯透露。
球員鬥志好到加零一嘅蘇格蘭老套啲講句，雖敗猶榮，編在強組，將世界盃兩隊決賽隊伍意大利、法國逼到埋場角，苦戰到最後一分鐘先至出局，冇說話好講啦。反觀佢哋嘅兄弟英格蘭，又話有世界級大牌球星，只一條中後場線球員嘅週薪，多過成隊蘇格蘭，但上場踢波不知所謂，編入弱組都冇法子提早取得出線，要靠足球小國以色列爆冷，在主場贏咗俄羅斯二比一，救番英格蘭一命。如果明日凌晨，英格蘭可以在主場摸和克羅地亞，就可以出線。你話英格蘭班球星在主場攞唔到一分嘅話，叫佢哋收山啦，唔好成日賴地硬。謝拉特為國家好少踢到好波，聲氣就多多。上星期就講到英格蘭超級足球聯賽太多外援，影響英格蘭隊，佢講嘢全無邏輯，即使英格蘭將來唔夠新人啫，𠵱家呢班球員都叫做係好波之人吖，謝拉特自己究竟踢成點呀，難道佢肯自認不如克羅地亞啲無名小卒？
聽朝凌晨要瞓覺，唔會睇波，最好就係英格蘭輸波，等謝拉特等人明年坐在酒吧睇歐洲盃！不過餐廳Ｒ當然唔同意，佢知道冇咗英格蘭，出年嘅歐洲盃直播會冇咁吸引，香港酒吧少好多生意，所以佢好希望英格蘭啲球員生生性性，唔好辜負以色列一番好意，聽朝千祈唔好輸波呀。以波論波，英格蘭稍勝一籌，但係泰利、費廸南、奧雲等主將唔出得場，龍門羅賓遜手軟腳震，睇落買兩隊打和較為好啲。