沈殿霞（肥姐）近排搬咗去尖沙嘴酒店式住宅居住，方便將九龍塘劍橋花園寓所放盤，佢鄰居兼好友張耀榮前晚喺無綫將軍澳電視廣播城出席台慶時，講到有關肥姐賣樓一事，佢話：「佢（肥姐）𠵱家放緊盤。」
肥姐上周六喺電視城發表「撐到底」宣言，堅持要以積極態度對抗病魔，肥姐坐言起行，噚日朝早9點幾到瑪麗醫院覆診，佢精神好好，由欣宜同工人扶入醫院，睇完醫生就即刻返咗屋企。
汪阿姐發火
另外，汪明荃噚日接受商台主持查小欣嘅電話訪問，有報道話佢同肥姐積怨七年，但阿姐否認。對於傳媒嘅報道，阿姐話：「我唔明每次有不實報道都要回應，啲電台節目主持同傳媒又不停問回應，藝人好似要打多份工咁。」點知查小欣答係，阿姐好勞氣咁話：「要言論自由但亂咁作，咁藝人咪好唔得閒？」講番上星期六無綫《萬千星輝頒獎禮2007》，阿姐話開騷前同肥姐喺休息室傾流程，肥姐好緊張，阿姐話不停用手捽佢雙手鼓勵佢，仲提佢出鏡要托眼鏡，咁樣會靚啲。肥姐起初堅持要行上台，但阿姐擔心佢支持唔到咁耐，所以叫佢坐輪椅出鏡。