意甲奧斯卡頒獎典禮將於明年1月28日喺米蘭舉行，有意大利球迷暴動作背景下，重要性同今年賀六叔百歲生日嘅萬千星輝賀台慶有得比。不過，由於上季好多球星外流，祖記又被罰降班，搞到今年份候選名單稍欠星味，羅馬同費倫天拿仲壟斷多個提名！
以往意甲奧斯卡大都由北方3雄壟斷，上季祖記罰落意乙、AC米蘭被扣分下，乘勢崛起嘅羅馬同費倫天拿，成為今屆大贏家。費倫共有5個提名，羅馬亦有4個，AC米蘭同國際米蘭分別有4個同3個，可見上季意大利洗過太平地後，其餘對手已經追上傳統3強。
卡卡伊巴爭最佳外援
雖然羅馬提名冇費倫天拿多，但最佳本土球員獎就出現「大契」鬥「細契」嘅情況，羅馬「大王子」托廸將同「小王子」廸羅斯爭崩頭；加埋光頭教練史巴利堤入圍最佳教練，最威嘅係羅馬先啱！費倫天拿嘅柏仙尼同蒙杜利禾齊齊爭奪最佳新人獎，亦反映該隊未來一片光明。
最具星味嘅屬於最佳外援獎，今屆歐洲足球先生大熱門伊巴謙莫域同卡卡雙雙入選，費倫天拿嘅梅度變相做咗陪太子讀書，認真慘！𠵱家娛樂圈巨星凋零下大興懷舊，今屆意甲奧斯卡亦有星中之星獎，一於請晒施丹、文仙尼等侏羅紀球星返嚟撐場面咁話！
今年唯一效力國外嘅候選人係維拉利爾嘅基奧斯比羅斯，上屆皇馬後衞簡拿華路就囊括最佳球員等3大獎，唔知羅斯仔可唔可以靠上季喺帕爾馬精采演出，一舉獲得最佳新人獎呢？答案兩個月幾月後揭曉！
意甲奧斯卡候選名單
最佳本土球員：托廸（羅馬）、廸羅斯（羅馬）、派路（AC米蘭）
最佳外援：伊巴謙莫域（國際米蘭）、卡卡（AC米蘭）、梅度（費倫天拿）
最佳門將：費爾（費倫天拿）、施薩索拉斯（國際米蘭）、佩雷斯（已掛靴）
最佳後衞：尼斯達（AC米蘭）、麥薩斯（羅馬）、馬特拉斯（國際米蘭）
最佳新人：蒙杜利禾（費倫天拿）、柏仙尼（費倫天拿）、基奧斯比羅斯（維拉利爾）
最佳教練：安察洛堤（AC米蘭）、柏蘭廸利（費倫天拿）、史巴利堤（羅馬）
星中之星：由近10屆得主角逐