20/11/07
晴天
最新動態
身邊有個朋友，做咗「觀音兵」多年，最近又見佢要開始節衣縮食，原因好簡單，聖誕節又就快到，佢心儀位女神開到口要萬幾蚊嘅名牌手袋做聖誕禮物。
各位男球迷係咪想嘲諷我朋友儍仔、或者鄙視所謂女神係名牌奴隸？大家賭波又會唔會受名牌效應影響？上周六好多所謂名牌球隊，都累人不淺，荷蘭、葡萄牙係就係要贏波出線，結果佢哋都僅贏一粒，斷估大家唔會捧單W啩？周日大家追住巴西呢隊南美名牌嚟賭，結果作客又和波，連個單W都唔畀你。唔係馬後炮，捧名牌之前，大家都要對賽制了解一吓。世界盃南美洲區外圍賽，10隊可以出4隊半，唔通你期望巴西贏足18場咩！基本上佢哋主場贏番6、7場已經夠出線，作客有幾認真，鄧加都答你唔到。
周三又有香港最大名牌英格蘭出場，英格蘭講真有番出線主動權，唔係佢哋叻，只係佢哋有運；今仗主場和克羅地亞就出梗線，最「弗」前鋒朗尼又缺陣，得1.5倍單W，我就唔信嘞。
牽牛
股市大旺，英超盛世，大家齊來贏多啲！
http://hk.myblog.yahoo.com/footballexperts/
逢周一至五見報