唔想屈膝於旺角及銅鑼灣的蚊型Cafe，被迫聽隔籬枱說三道四，望住碟無味炸雞翼同厚多士，灰晒！一於教你撲去長沙灣搵食，工廠區？NO！商業樓宇至真！呢度白領一族多到你唔信，茶餐廳、中菜館開個不停，開業已有兩年的UnoUno早就攻陷一眾OL心，大廚坤哥說：「Lunch必爆場，Book枱都未必得！好多客寧願WalkIn，企門口等幾個字。」咁咪冇咗四分一時間？為了一碟碟真誠製作的意大利菜及蛋糕，花多一點時間及金錢又何妨？UnoUno屢獲好評，大讚拍得住酒店級數，事關老闆捨得用貴價食材，牛扒、羊鞍竟是來自元朗的鮮肉，並非急凍肉；差不多每枱必點的Homemade蛋糕也出自天然，不加人造色素及香料，唔怪得咁多OL行足幾條街，都要外賣返公司當下午茶啦！UnoUno由300平方呎蛋糕批發餅房，擴充為5,000平方呎的餐廳加餅房，店面已坐擁超過1,800平方呎，食晏時坐滿近百人，也不覺迫迫狹狹。食物及環境水準超晒班，平均消費只需$50至$100左右，原來「工廠區」都有好嘢食㗎！
記者：盧家蕙
攝影：陳陶鈞
綠茶紅豆蛋糕（前）
雲石芝士蛋糕（後）各$22
紅豆先以糖水浸泡，加入大量日本綠茶粉，味道濃淡得宜；芝士蛋糕非常滑溜濃郁，絕不嚡口。
農場鮮嫩牛扒配焗薯菜燒汁$68/套餐
新鮮牛扒肉味濃郁，入口Juicy，自己買塊靚扒煎都差不多價錢，仲要跟套餐，難怪受白領客仔追捧。
法式香草蒜茸焗羊鞍$98/套餐
先煎後焗的羊鞍，因已鎖緊了肉汁，內裏生一點更好吃，充滿獨特的羶香鮮羊肉，嗜羊之人必食。
UnoUnoCafe（27272525）
地址：長沙灣道750號廣大工廠中心一樓
營業時間：11:30am-10:30pm（星期日及公眾假期休息）