單係聽到bB呢個名字，就令我聯想到媽咪手抱嘅真人BB，有種細細粒、小巧兼要人呵護嘅感覺；ToyotabB係就係細，不過純係視覺上嘅感覺，揸部bB出街比起好多車仔都大，尤其係呢款熱辣到港嘅bBStreetBillet特別版，加咗套Modellista大包圍，又型又有氣勢，有咗佢包你唔會再話bB無氣無力，反而性能氣勢大好㖭！
記者：梁美甜
攝影：陳盛臣
模特兒：Tiffany
Modellista操刀講有型
嚴格來說，呢部由水貨車行引入嘅bBStreetBillet版本，初時聽落無特別，事關驟眼望落去同普通版無咩大分別，但原來佢係加咗由Modellista提供嘅全車包圍，同埋好有跑車Feel嘅17吋合金胎軨，諗真就知加咗大包圍嘅佢，淨係齋睇個Look，就已經知佢係部潮人座駕！
熟悉日本車、尤其係改裝車嘅朋友，都知Modellista係咩東東。其實，Modellista係Toyota自己嘅改裝部門，若然改裝之後性能同個Look望落去差咗嘅話，咁改嚟做咩，所以佢嘅出品絕對係性能增值保證。單看呢套Modellista大包圍真係好型兼突出，太陽底下仲閃過人㖭！外表煞食之餘，中尾鼓、17吋胎軨同高流量風隔，都令到部車嘅加速、入彎時抓地力增強唔少。
集齊潮流元素
坦白講，論性能、造工、操控性能各方面，市面上有不少車款都好過ToyotabB；不過，揀得bB嘅大多數只係因為佢嘅包裝夠潮有型格，完全可以滿足一班年輕車迷追趕潮流嘅心態，唔通大家話GiorgioArmani嘅T-Shirt，又或者adidas波衫潮過件BapeTee咩，係咪？
bB有切合時下潮流特徵，誇張嘅車身線條、例如向上翹嘅頭燈、搶眼嘅MetallicColor、發出藍光嘅夜光音響喇叭，最盞係佢有超大嘅改裝空間，例如可以喺車廂入面加好多有BlinkBlinkFeel嘅水晶裝飾，又或者將佢變身做一間流動部屋咁，完全啱晒高度追求個人風格嘅潮人。唯一美中不足嘅地方，就係中控台頂端嘅錶板設計，除咗佢嘅所在位置有啲突兀之外，如果可以改成全液晶體顯示嘅話，我諗會更加型囉！
操控易 曬月光至正
最得我歡心嘅係前座，一排過設計感覺寬敞，加埋天窗，無論係揸車抑或係前座乘客都可以坐得舒服，兼且可以同身邊嘅人感覺親近，至啱同Honey遊車河曬月光！
講到操控，新bB雖然係軚自動波，初時揸落有啲唔慣，但好快就上手，加上腰線低視野開揚，感覺睇得通啲，揸起上嚟信心都大啲！直路加速還可以，但掟彎就差啲，始終車身高，而懸掛設定又偏向舒適，所以轉彎時稍為「超速」的話，傾側角度得較明顯。
不過，佢嘅最大賣點都係嗰台1.5公升引擎，注入咗VVT-i技術嘅佢，唔止有109匹馬力，而且仲好慳油，拉勻每公里嘅油錢都只係約$1至$1.2左右，最啱係用嚟對付近排油價高企嘅日子。
ToyotabBStreetBillet規格
引擎：1,495c.c.直4DOHC
馬力：109ps/6,000rpm
扭力：14.4kgm/4,400rpm
傳動：4前速自動波，前輪驅動
車輛提供：偉昌汽車（23030328）
