今時今日學曉兩文三語好重要，好似噚日，中信1616（1883）主席石萃鳴請傳媒食飯，一眾傳媒行家大安旨意以為石總嚟咗香港咁多年，大家可以用廣東話交談，點知石總話，𠵱家中港關係密切，大家應該珍惜學習機會，多啲用普通話溝通。
佢仲話，當年仲喺中國電信做嗰陣，有個香港高層初入公司，開頭一句普通話都唔識，經過多年學習，𠵱家已經變咗中國通。
石總係內地第一批下海嘅郵電部高官，之前曾經出任中國電信，即係𠵱家中移動（941）董事長、聯通（762）執行董事等職務。家吓幫中信集團搞1616，好多人都會覺得佢哋返大陸做生意會容易好多。不過，石總話，如果搵舊同事食飯自然冇問題，但如果講到雙方合作，而自己公司又唔爭氣，咁搞法，搵多幾次人哋都怕咗你，所以最緊要係自己做好啲，提供嘅服務要好先有偈傾。