過往十多年，《AceCombat》向來都係新力主機嘅台柱之一，誇張啲講直頭係Namco當年同SCE結盟嘅合作結晶，事關街機版都係用PS互換底板，兩者關係殊不簡單。之不過呢隻曾經象徵PS陣營嘅空戰名作，全新第六集竟移師Xbox360繼續發展，唔係信心爆棚肯定唔敢咁激玩叛變，睇真啲原來除咗畫面作出極級改良外，經XboxLive上網搵人互抽亦變成有無限可能性。講真呀，鬼叫你PS3連網配套做得咁雞咩！
文：陳福榮
16人網上凌厲混戰
如果要講《AC6》同以往作品有乜大分別，無疑係佢通過XboxLive達成下載追加武裝，同埋搵志同道合上網互相決戰。先講單撈部份，佢學晒同廠《塊魂》咁款幾乎乜正嘢都要畀錢先買到，雖然成隻Game點都有十幾部戰機俾你揀，但強化武器以至變更塗裝都要去MarketPlace用真金白銀買，基於收費不菲買多幾款都幾襟計吓。
至於上網對戰以及合作執行任務，佢最多容許16人一齊開戰，分做兩隊互相火併加埋用咪同隊友通話過料，咁都算幾過癮。合作方面則當正大家係電腦僚機，有時幫手辣吓敵人，有時則夾吓計玩搞亂檔，始終連線速度理想冇乜明顯嘅Lag出現。
湖光山色恍如實境
《AC6》相比起PS2之前嗰三集，簡直有着徹底脫胎換骨之感，即使表面看玩法唔會有太大分別，但戰機本身嘅解像度同實在感已完全不能同日而語，都未計其他光源效果如爆破火花等，越來越似睇緊啲試機用光碟咁誇張。當然各個版面嘅背景亦唔講得笑，城市細緻到幾乎每層樓都係獨立咁砌出嚟，山脈低谷嘅像真度，高到以為係相片一樣。但Zoom到最近，都會發現其實都幾粗糙。但正常嚟講肯定能滿足所有玩家甚至旁觀者嘅要求。
就算畫面天下無敵，玩唔掂又係冇乜意思，始終並非所有人都係玩足咁多集。隻Game設有極詳盡嘅教學模式，圖文並茂，慢慢掌握各種技巧。喺版面途中瓜直唔需要由頭打過，俾你由死之前嘅CheckPoint接關玩落去，咁就輕鬆易玩得多啦。
專用飛機掣超矜貴
好多人打機都想有頂級享受，有要求者當然想用埋專用控制器，當正自己係《TopGun》靚佬湯啦。幸好手掣名廠HORI幫《AC6》出咗隻360專用「飛機的」，儘管佢冇行貨返，微軟好識做，班咗支畀香港傳媒親身享受，就等小弟試吓到底佢值唔值得入貨啦。
根據資料，呢支棍仲可以插落PC玩番啲模擬飛行遊戲，參照住真實戰機支棍嚟做。現貨甚少定價仲至少$800，有地方更炒到過千。
本周五免費試玩
事實上喺試玩當日，微軟仲擺咗另外兩款新作任成班行家試玩。分別係堪稱NBA遊戲界最佳之選嘅2K系列最新一集《NBA2K8》，以及因為內容太激，新加坡企圖禁售嘅《MaEffect》。順便提埋大家，本周五在沙田新城市廣場舉行一年一度試玩活動X07，唔只有得玩呢兩隻勁作，收到風仲有萬眾期待嘅「惡魔或會喊4」，想率先玩，大家記得早啲去排隊。
機種：Xbox360
廠商：NBGI
類型：STG
人數：1人（網上16人）
日期：11月22日
價格：$299
查詢：微軟（800964215）