昨日港股悶到嘔，現貨成交差啲唔夠1000億，喺以前，好多人都會去咗行街睇戲，懶理個市，不過𠵱家冇計，唔少股民成手蟹貨，就算瞌眼瞓都要望住部大利是機。
睇勻個市，又安全又值博嘅股份真係唔多，昨日提過啲電訊股或者會好啲，聯通（762）同中電信（728）算係強勢嘅股份，應該仲有得升。其他國企股，都係反覆偏軟嘅多，地下錢莊呢單嘢會點發展係一個大變數，股民傾向觀望好正常。至於花旗嗰邊真係唔敢奢望，美元如果再撻落嚟，花旗股市真係NoEyeSee。
中交建C輪5771：中交建（1800）昨收22.15元，美林調高中交建目標價至27.5元，多咗人追入，股價有機會升破23.2元，再炒上25至27元，可以諗吓隻C輪5771，昨收35仙，有效槓桿率4.7倍。
正股升上25元同27元，5771會喺58仙同76仙，正股跌穿21元止蝕。