曾經係基金愛股嘅聯洲國際（048），8月初公佈，主席史璧加喺西班牙養病，職務要由副主席李嘉渝負責，直至上個月，史璧加因病去世。上個禮拜五，聯洲又出通告，話董事植浩然以健康理由辭任。
一家上市公司高層接連出現健康問題，唔知係咪同工作壓力大有關，事實上，聯洲近年的確唔少負面消息，好似史璧加病緊時，公司因為賬目問題，俾「股壇長毛」DavidWebb狠批，搞到股價急瀉，前嗰排公司公佈業績，又錄得全年虧損達19.59億銀。家陣公司仲停緊牌，股價年初至今急挫八成五。
不過，工作幾大壓力都好，都要顧住身體，華華喺度寄語聯洲董事，真係要保重。