做人老竇的張智霖（ChiLam）繼早前擲220萬買平治新車後，原來月前已舉家搬竇，由2,400呎波老道半山寓所秘密遷進月租13萬、3,300呎舊山頂道花園台海景豪宅，前晚他更偕太太袁詠儀（靚靚）和B仔「魔童」，齊到灣仔明星飯堂海都酒家開餐，實行要妻兒住得舒適、食得招積。
張智霖和袁詠儀的愛情結晶品張慕童（魔童）霎眼已滿1歲，自他出世後，ChiLam更修心養性，事事以家庭為先，早於半年前已睇樓搬竇，好讓妻兒有更大活動空間，結果終睇中舊山頂道花園台，與許晉亨做鄰居。
追求優質生活
之前ChiLam和靚靚一直居於波老道2,400呎半山豪宅Bowen'slookout，近月舉家遷進樓齡24年、約13萬月租的花園台3,300呎海景單位，新屋除了面積比前大外，私隱度也較高。其實ChiLam早前已購下全球限量50部、價值220萬的平治G55越野車，作為送贈妻兒代步的禮物，想不到近期索性搬竇，令妻兒生活更舒適。
前日下午，靚靚在跑馬地出席宣傳活動後即返花園台新居，至6時許才偕ChiLam及抱着魔童上車，直往灣仔海都海鮮酒家，其間靚靚還指着放置在酒家內的魚缸，示意囝囝看海鮮。
上山服侍俞琤
其後ChiLam表姐上山詩鈉到場，送同行眾親友入酒家後，便獨自站在門外等候，與她傳緋聞的商台高層俞琤，數分鐘後駕駛落地兩個月、價值逾220萬的AstonMartin新車抵達，她落車時手拎西裝褸，上山詩鈉連忙趨前為她穿西裝，並尾隨俞琤進酒家，與家人一吃進餐。
不過日理萬機的俞琤遲來又早走，吃了一小時便先告退，上山詩鈉和ChiLam一家等在9時多亦各自離開，躲在靚靚懷裏、樣貌似足老竇的魔童甫出酒家還眼仔睩睩勁精靈，然後才隨父母登車齊齊回家。
採訪、攝影：娛樂突發組
