煲呔曾的施政報告曾明言，將於年底前推出醫療融資文件，諮詢民眾，究竟全港打工仔每月應供幾多錢？
健康係無價寶，港府此舉為全民健康而未雨綢繆，當然值得加分，但講到錢，家陣打工仔已經每月被迫供5%強積金，如果再要額外供醫療保健，心情肯定唔靚。家陣政府庫房「水浸」，如果政府真係咁「仁民愛物」，就應該有啲表示。
走勢落後可追
有散戶直言，如果政府真係強制全民醫療融資供款，惟有買番些少香港體檢（397）及康健國際（8138）做「對冲」，以補償供款所失。二揀一，星俠較偏愛香港體檢，因該股走勢較其「母」康健相對落後。上周五跟隨大市下跌，收0.204元，若股價短線守穩0.20元，將有反彈，若升穿0.265元，料可更上層樓，挑戰0.32元水平。
香港體檢作為行業龍頭，最近公佈中期業績突飛猛進，純利4686萬元，顯示集團併購其他體檢網絡後，盈利貢獻逐步反映。集團手頭現金達3.06億元，令未來擴張市場份額如虎添翼。