【澳門直擊】楊千嬅前晚在澳門擔任歌唱比賽表演嘉賓，談到劉德華以1.5億加盟寰亞3年，將與華仔成為同事的她大表歡迎，大讚林建岳好眼光，還笑謂「勁過買塊地」。
林建岳前晚率領旗下藝人楊千嬅、何韻詩和衞蘭等在澳門出席「東亞澳門新星選拔大賽」，結果由彭永琛奪冠，組合Trinity獲最佳台風獎，容甄甄則奪最具潛質獎。
暴肥賴水腫
寰亞集團以1.5億羅致劉德華加盟旗下，問老闆林建岳是否簽了巨星？他笑笑口說：「你哋講劉德華呀？」問他跟華仔洽談多久？林建岳說：「我同佢合作咗20年。」續問是否開出豐厚條件才打動到華仔，他說：「係呀，好難，因為佢一開聲就叫我畀演唱會飛佢。」談到華仔的個唱反應甚佳，問林建岳可打算加場？他說：「紅館冇期。」會否移師亞洲博覽館？他說：「劉生對啲fans好好，唔希望佢哋坐太耐車。」
千嬅對於華仔加盟表示高興，還大讚老闆說：「老闆勁過買塊地，華仔係勤力指標，同一間公司覺得好榮幸。」碰巧林建岳經過，聽到千嬅讚自己，他說：「買塊地只可以賺一次，你就可以長搵長有，幫公司搵多啲錢。」千嬅笑說：「都話老闆有金句㗎啦。」
有指衞蘭因翻脹令纖體公司不滿，需要賠錢，前晚所見她確實暴脹不少，她說：「冇罰錢，呢排錄歌飲得水多，係水腫。」有指她踎街吃水果，她說：「好醜怪，以後都唔會踎街，我只係踎咗1秒就畀人影到。」
結婚避緋聞
此外，千嬅昨在銅鑼灣為其「心情日誌」舉行啓動禮，更透露會在blog中分享早前到日韓旅行的照片，當中的獨照由途人幫手影。問為何不是丁子高影？她說：「我自己去，佢啲嘢唔回應喇，可能要我結婚先會斷尾。」記者笑言不是和丁子高結婚，也未必會斷尾，她說：「呢個世界好多男人，畀我揀吓先。」
採訪、攝影：林惠卿、馬建華
