叱咤娛圈大半個世紀的邵逸夫（六叔），不但打造了邵氏、無綫這兩個電影電視王國，培育了無數演藝人才，在教育方面，六叔更頻頻捐款建校，貢獻良多，深為後輩敬重。明日就是六叔100歲生日，跟六叔相交多年的顧媚、顧嘉煇和狄龍，以及為六叔效力多年的陳志雲和樂易玲，紛紛送上祝福，希望六叔健康快樂，並以健康體魄繼續發揮其樂於助人之美德。
採訪：戴彩煥
顧嘉煇成就六叔所賜
顧嘉煇60年代到美國音樂學院留學，獲六叔資助照顧在港妻兒，對煇哥而言，今日一切成就全是六叔所賜。
顧嘉煇：「我認識六叔都係因為方逸華，我當年考到獎學金去美國讀音樂，方逸華同六叔講，話有個人好有天份，睇吓可唔可以幫吓佢。後來六叔叫我上去佢寫字樓，問：『點可以幫到你？』我話美國領事館要有個擔保人，跟住佢叫我將資料寫喺紙度。點知佢唔單止做擔保人，仲幫我照顧埋香港屋企人生活，一個月畀成500蚊，等我專心讀書。
「我唔敢講我音樂上有乜成就，但如果唔係因為佢，我就冇今日，喺美國嗰兩年，對我事業有好大幫助。我學成返嚟，佢又冇話扣番啲錢，不過，後來我都入咗TVB幫佢做嘢。我好感激佢，希望佢永遠咁健康，嚟緊日子可以繼續幫到好多好多人，好似邵逸夫獎咁，唔單止幫到香港同內地，仲去到全世界，真係抵佢咁長命。」
顧媚感激御准秘撈
有「小雲雀」之稱的顧媚曾為邵氏藝人，又是方逸華閨中密友，跟六叔關係熟絡，不時代方逸華陪六叔睇戲食飯。
顧媚：「邵逸夫係一個好人，心地好好，以前我喺邵氏錄音錄到好夜，佢就叫我買部車代步，向公司開數。我簽咗邵氏8年，公司本來唔畀藝人接其他工作，但我要生活，我叫邵逸夫畀我出去登台賺生活費，佢都畀我去，真係好感激佢。佢做起事上嚟都幾嚴肅，公事公辦，但同演員相處嗰陣就好隨和、好親切，平時生活都好簡單好樸素，到??家都係住喺清水灣大廈，記得佢下晝唔食飯，食得好輕。
「幾個月前我返香港都有見過佢，見到佢好開心，記性好好，好精神。咁多年嚟，佢都一路幫人，真係好難得，希望佢有咁長命得咁長命。
狄龍難忘救命恩
曾為邵氏當家小生的狄龍，年輕時曾因醉酒闖下大禍，幾乎自毀前途，幸得六叔出手相助。
狄龍：「六叔好照顧好關心我哋後輩，當年自己闖咗禍，都係全靠六叔幫我解決困難，嗰陣時我飲醉酒，同警察打起上嚟，六叔親自寫信同我求情，用佢社會地位話狄龍唔係一個好勇鬥狠嘅人，我好多謝佢。以前佢成日帶我哋參加影展見識，後來又帶埋我哋去旅行，佢有一種先知，知道收番香港、知道內地開放，所以帶我哋返內地見識，六叔返親去都受國家級招待，如果唔係因為佢，我對內地都未必有咁深入了解。
「六叔做好多善事，又建醫院又起學校，喺內地，啲人當佢聖人一樣。佢脾氣好好，就算遇到啲嘢唔合意，唔係佢杯茶，佢都只係會講句：『好特別！』佢今日名成利就，健康咁好，我覺得唔使加添任何說話，佢作為一個老人家典範，唔在乎其他嘢，希望佢隨心所欲就足夠。」
陳志雲讚觸覺敏銳
無綫總經理陳志雲是六叔和方逸華愛將，不時獲方小姐與六叔邀約茶敍、飯局甚至外遊。
陳志雲：「氣功之外，阿Sir仲好喜歡做踢腿同伸展運動。TVB董事局會議，佢都會出席，每日又會返舊邵氏大廈上班睇報紙。阿Sir平日仲會睇好多電影同電視節目，永遠冇同時代脫節，記得有年開會我哋present一個巴西節目《人生交叉點》，佢猛讚好，話節目好互動，又話互動係未來潮流，好有先見之明。
「自己最敬重阿Sir其中一項，係佢對教育方面貢獻，佢認為教育唔係一個開支，係投資，培育社會棟樑，所以無論香港、內地或者海外，佢都有好大貢獻，而且從來不求回報。有時我都會同阿Sir、方小姐出埠，舊年我陪阿Sir去雲頂睇騷，阿Sir一去到，全場觀眾即刻起立拍手掌，場面好感動。希望佢老人家永遠健康快樂。」
樂易玲敬六叔樸素
樂易玲83年加入邵氏而有機會跟六叔接觸，離開邵氏多年後到無綫任職製作資源部副總監，深得方逸華器重。
樂易玲：「六叔係我一位好敬佩嘅長者，無論影視行業或者教育方面，佢都有好大貢獻，好多富豪都會做好多投機生意，但佢冇，佢只係會將佢賺番嚟嘅錢攞去做慈善、做教育。佢係一個好低調嘅老人家，除咗自己朋友之外，唔喜歡應酬，咁多年，香港同海外都有好多獎項頒畀佢，但佢好少親自去攞，連傳媒訪問都唔做，對名利睇得好淡。
「好多年前，佢已經將資產分配畀下一代，自己就成日兩袖清風，唔好咁多牽掛，好樸實，衣着都好樸素，唔買名牌衫，佢最靚就係啲座駕。六叔平時清茶淡飯、早睡早起，做吓氣功，對人對事都好豁達，樣樣睇得開，唔斤斤計較，自然就會長壽。佢對後輩好和藹可親，咁多年嚟，我都冇見過佢發脾氣或者鬧人。」
感情篇 承認風流
邵逸夫是影視大亨，圍繞身邊的靚女多不勝數，而他先後娶了黃美珍和方逸華為妻。六叔每天都面對不少年輕貌美的女星，曾經傳出種種風流韻事，但他80年接受訪問時說：「我同啲明星接近得多，啲人想像咗好多嘢出嚟啫。」但也承認有同女明星出街、食飯、跳舞等，更概括一句：「我可以說，我風流而不下流！我liketo風流！Butnever下流！」近年六叔對年輕女星疼愛有加，曾被目擊跟無綫藝人曹眾手拖手共晉晚餐。
子女篇 易子而教
邵逸夫與元配黃美珍育有兩子兩女，分別是維銘、素雯、素雲及維鍾。對於教導子女，六叔採用「易子而教」的方式，他負責管教他三哥邵仁枚之子邵維錦，他的兒子則由三哥教導，他曾說：「教姪，似乎好啲，又容易啲！」而且他也可以憑透過姪仔知道兄長的事情，反之亦然。月前舉辦的邵逸夫獎頒獎禮，六叔兩名兒子及姪兒維錦都有到場，一家人濟濟一堂。
養生篇 氣功回春
六叔精神飽滿，步履穩健，年前他接受訪問時曾謂他每天只睡5小時，下午又小睡1小時，其餘的時間全都用來看電影。70年代開始，六叔更經常以人參補身，一年要食四両，當時的人參價格就高達幾萬元一両。但自從77年他拜師練氣功後，就停止進食人參，每天清晨5時半起床後便會鍛煉兩小時，更表示練氣功好有效，令他「身子變成年輕咗！」而且「瞓得！食得！好有精神！」他又說：「𠵱家我一練，三分鐘之內，就成個身滾晒！」
慈善篇 年捐逾億
邵逸夫曾說過「人說賺錢雖難，但懂得將錢用在最適當的地方更難。」他年輕時已熱心公益活動，73年成立香港邵氏基金，致力促進教育、醫療等社會福利。85年起，邵逸夫每年都會捐贈一億元以上予內地，建設超過百所大中小學。90年，中國政府將一顆新發現的行星命名為「邵逸夫星」，以表彰他的功德。邵逸夫03年設立了邵逸夫獎，每年頒發100萬美元（約780萬港元）獎金予傑出成就的科學家。
邵逸夫大事年表
年份：1907 事件：11月19日，生於浙江寧波鎮海
年份：1932 事件：由新加坡到香港發展電影事業
年份：1937 事件：與黃美珍結婚，婚後育有兩子兩女
年份：1958 事件：成立邵氏兄弟（香港）有限公司，並於清水灣興建影城
年份：1965 事件：與利孝和及余經緯等創辦無綫電視，並於11月19日啓播
年份：1967 事件：與方逸華邂逅
年份：1980 事件：邵逸夫成為無綫電視最大股東，出任董事局主席
年份：1987 事件：元配黃美珍於美國逝世
年份：1997 事件：與方逸華於美國註冊結婚
年份：1999 事件：獲特區政府頒發大紫荊勳章
年份：2006 事件：獲台灣金馬獎頒「終身榮譽大獎」
年份：2007 事件：獲香港電影金像獎頒「世紀影壇大獎」
資料來源：《蘋果》資料室
國際著名人瑞
宋美齡（106歲）
蔣介石妻子，被譽為中國「永遠的第一夫人」
巴金（100歲）
中國文學大師
金婆婆（107歲）、銀婆婆（108歲）
日本著名長壽孿生姊妹
卜合（BobHope）（100歲）
美國喜劇泰斗
張學良（101歲）
民國軍閥張作霖長子、1936年策動西安事變
IrvingBerlin（101歲）
美國著名作曲家
英國皇太后（101歲）
英女皇伊利沙伯二世的母親
高思謙（110歲）
居於大嶼山神樂院的一名神父，目前在港最老的人瑞
內斯特（HryhorityNestor116歲）
仍在世的最老烏克蘭人瑞，正申請加入《健力士世界紀錄大全》
資料來源：《蘋果》資料室
