闊別螢光幕多時的開心果沈殿霞，前晚亮相《萬千星輝頒獎典禮》，接受無綫頒發的最高榮譽「萬千光輝演藝大獎」。與頑疾對抗多時的肥姐，坐在輪椅上發表「撐下去」宣言，教在場好友、花旦小生甚至坐在電視機旁邊觀看的前夫鄭少秋也感動不已。領獎後肥姐在愛女鄭欣宜陪同下到富瑤酒家消夜慶功，獲一眾好友拍手歡呼祝賀。
前晚肥姐出席頒獎禮發表「撐下去」宣言後，於晚上約11時抵達尖沙嘴富瑤海鮮酒家消夜慶功，原來肥姐愛女鄭欣宜、好友狄波拉、鬍鬚Kong、李琳琳和張徹太太等一早已在食肆等候。肥姐在一女性友人攙扶下走進食肆，即獲一眾好友拍手歡呼，為肥姐獲獎及堅強表現喝采。
深受感動
「希望佢重建歡樂形象」
肥姐等人逗留至凌晨約1時才離開，換上便服的肥姐由鬍鬚Kong和欣宜小心翼翼扶上車，記者趁機問肥姐獲獎是否高興，但肥姐未有回應便乘車返回暫居的新世界酒店，看來有點疲累。
前晚肥姐攞獎，前夫鄭少秋雖然未有現身，但也留在家中看電視，被肥姐「撐下去」宣言深深感動。秋官昨在電話中說：「自己睇到都好感動，佢攞到咁高榮譽，梗係戥佢高興、支持佢。佢一向以開心形象示人，一時間遇到挫折，受到咁多困擾困難，希望佢快啲度過難關，快啲康復，重建歡樂形象，大家都等緊佢再喺電視出現，再帶歡樂畀大家。」
此外，欣宜在今晚播映的《志雲上素》擔任嘉賓，被問到肥姐的健康情況時，她說：「都唔錯，精神唔錯，但容易攰，要成日休息。」問肥姐是否很「難湊」時，欣宜說：「難㗎！佢唔聽話，又想食薯片薯條，真係好似小朋友。」有傳上月肥姐因食大閘蟹導致身體不適，但欣宜表示不清楚，若然肥姐偷偷進食她也不會知道。
肥姐過去一直希望欣宜完成大學課程，不希望她加入娛樂圈，被問到如今放棄學業投身演藝工作，會否感到對不起肥姐時，欣宜說：「本來上年諗住讀第二年大學，不過舊年暑假有啲唔好嘅嘢喺媽咪身體入面，咁我就決定咗陪媽咪，我唔陪佢，邊個陪佢？」
愛女心聲
「你要叻唔好衰畀人睇」
問欣宜有甚麼話想告訴肥姐時，她即手指指對着鏡頭說：「你要乖！你要堅強！你要叻！唔好衰畀人睇，你係一定會好番。你已經好番好多，所以你𠵱家乖啲，你好番晒之後，我同你勁擦一大餐。」
此外，欣宜被問到會否因與吳卓羲的「世紀之吻」及扮白雪公主惹來諸般批評，而對娛樂圈感到怕怕時，她說：「唔會，我唔係為咗入娛樂圈而入娛樂圈，我係鍾意唱歌，熱愛唱歌同想入娛樂圈係兩回事，就算我唔係做歌星，音樂都係partofmylife。之前係好多負面新聞，𠵱家都有，如果我可以克服到呢啲嘢、學識笑自己，唔理會人哋點諗，我自己會開心啲。」
採訪、攝影：戴彩煥、娛樂突發組
全城熱話：觀眾為肥姐感動落淚
前晚肥姐沈殿霞帶病亮相無綫台慶頒獎禮，令不少電視機前的觀眾為她的鬥志感動落淚。
黃小姐：
睇到肥姐出嚟嘅場面好感動，見到佢瘦咗好多，講嘢都好辛苦咁，自己都喊咗出嚟，又冇咗以前嗰種歡樂笑聲，希望肥姐加油快啲康復。
伍先生：
肥姐瘦咗好多，同以前兩個人咁，見到肥姐同個女一齊真係有啲感動，令我覺得健康好重要。
簡女士：
前晚喺電視突然睇到佢瘦成咁，個心都好唔舒服，見到都眼濕濕好陰功，我會為佢祈禱。
lun606（uwants討論區）：
咁大個仔未試過睇電視睇到喊，不過啱啱見到肥姐出場開始眼濕濕……
woofyboo（香港討論區）：
肥姐加油呀！真係瘦咗成倍，我都諗唔到嘟嘟見到肥姐會喊，好感動，希望有奇迹出現！
宇宙之星（香港討論區）：
終於都可以在電視再一次見到肥姐啦，雖然精神沒有之前咁好，但我相信希望在人間。