今年賣樓量爆晒燈嘅恒地（012），旗下推出短短兩日嘅長沙灣星匯居，連同較早前已預留嘅單位，至今已累售超過180個，平均呎價6700元，套現近9億元。賣得咁快，其中一個原因係有投資者掃貨，一買就96伙，即係近四分一嘅單位俾佢掃晒。
封盤前睇星匯居
由於銷量十分接近發展商嘅目標，聽聞即將封盤，留番入伙再賣。仲想買番個單位等入伙升值嘅準買家，趁仲未封盤嗱嗱臨去睇吓啦，示範單位喺尖沙嘴美麗華大廈。
睇完樓，近近哋可以行吓大角嘴奧海城2期，商場有個名為優質休悠遊英國嘅活動，顧客可以同PeterRabbit，同香港杜沙夫人蠟像館提供嘅占士邦蠟像合照，仲有機會贏取英航雙人來回香港倫敦機票及古蹟通行證；下晝兩點至三點，歌星官恩娜會出席，介紹英式下午茶兼暢談遊英國嘅體驗。