你投咗票未？今日區議會選舉投票日，每一票都好重要，四年前區選，大家懷着03年7.1大遊行熱情去票站，令投票率高達四成四，一鋪打殘左派、保皇黨，民建聯副主席葉國謙觀龍敗北，曾鈺成更要辭去民建聯主席，黯然落台。
對惡法視若無睹
當日大家用選票掃走左派候選人，係因為佢哋支持葉劉等人硬銷23條，對老董政府種種倒行逆施政策視若無睹，呢啲出賣港人利益嘅黨派，應該俾人唾棄。事隔四年，葉劉可以為咗選票低頭道歉，民建聯都差唔多，八方希望大家記住佢哋做過乜嘢「好事」，呢班人當道嘅時候，大家真係冇乜好日子過，所以千祈唔好畀佢哋博大霧當選。
多個民主派中人異口同聲話今次選舉形勢堪虞，輸少當贏。四年前民主派大約有250人參選，贏咗大約170個議席，當中139人今屆角逐連任，形勢比人強，民主派唔奢望議席有大幅進賬，保得住呢139個議席已經上上大吉。根據往績，爭取冧莊者大約只有八成成功率，即係話民主派最壞情況只有111人當選，要將28席拱手相讓予左派，大家四年前掃走左派努力前功盡廢。
歷年選舉數據顯示，投票率高多數對民主派有利，03年區選四成四投票率令民主派節節領先，04年立法會選舉，逾五成半投票率亦令多名大狀成功上位，所以除非你想左派一鋪大翻身，否則今日記得去投票。
投票率難刷新高
五成半投票率係歷史紀錄，要刷新高相信十分困難，保住03年四成四呢個數字都唔樂觀，民主黨副主席單仲偕話最多四成，跌破呢個數字該黨成績凍過水；社民連主席毓民最悲觀，指已作最壞打算，投票率隨時跌至三成八，甚至尋底下試99年區選三成半投票率，佢坦言如果咁少人投票，社民連20個新人隨時全部落選。
職工盟李卓人認為投票率可保四成四，因為今屆唔少選區競爭好激烈，候選人落力催票令投票率唔會大跌，不過佢話以佢了解今次好多新選民係長者，相信佢哋多數係左派鐵票，即係話投票率高民主派都未必有着數，所以唔想左派贏凸、唔想民建聯、隱形民建聯橫掃選舉，贏到開巷嘅選民，今日一定要投票，否則後悔就太遲喇。