後生仔潮興結識網友，「新的一葉」都趕時麾，噚日喺銅鑼灣鬧市同facebook朋友真情對話。大家對葉劉政綱興趣不大，最多人問佢感情問題。葉劉豁出去，自爆72至73年喺新法書院教書時險搞師生戀，有個學生約佢放學後睇戲，葉太話做女仔時好矜持，「我當然唔敢去啦！」
美國佬facebook邀約
葉劉自言喺facebook識咗好多真朋友，最驚奇係引來狂蜂浪蝶，佢透露喺facebook收過一個"Areyouinterested？"嘅邀請。唔知葉劉真唔知定扮純情，「我以為佢問我有冇興趣食雲吞麵，咪答yes囉！」之後發現對方係個美國肥佬，唔係約佢食麵，而係想約佢見面！咁葉劉有冇興趣接納其他追求者呢？佢話唔到佢話事，事關若有人追佢，乖女一定勁呷醋。八方問葉劉囡囡葉榮欣，如果媽咪有新歡點做，佢好激動咁話，「如果有人追我媽咪，我係絕對唔會批准嘅，每一個嚟我都會掃佢走！」