行年43嘅畢彼特（BradPitt）越老越有男人味，佢走紅至今都係咁型，就算拍喜劇都保持英俊瀟灑嘅形象，從來唔會以娘樣示人。不過𠵱家啲網友實在神通廣大，日前竟然有人將畢仔成名前所拍嘅薯嘜廣告出土，片中畢仔仲打大赤肋，認真大犧牲。
閉眼扮享受
廣告係畢仔喺1988年為品客薯片所拍，當時24歲嘅佢真係仲薯過啲薯片。同當年嘅大部份廣告一樣，呢個廣告冇乜橋段可言，只係影住班少男少女食薯片遊車河，畢仔同埋一班男演員全部赤膊露胸肌。睇見畢仔打大赤肋喺烈日下「印」身「印」勢，食薯片時仲要合埋雙眼扮enjoy，真係爆笑到極，點都諗唔到當日呢個黃毛飛，日後竟然變身荷李活巨星。
網友睇完呢個廣告，反應幾兩極，有人讚畢仔後生時青靚白淨，網友kelly話︰「佢又後生又瘦，而且好靚仔，但我都係鍾意𠵱家嘅畢仔多啲，佢好似酒咁越老越醇。」但都有網友大鬧難頂，22Gwynnypoo好直接咁話︰「我想嘔。」
網址： http://www.youtube.com/watch?v=mucuLrWHGqc&eurl
版主：網盜王尊尼Deep
本欄逢周一至五刊出