港人平日三餐以外，三點三食Tea，半夜三更嘆消夜，加上反傳統的飲食習慣，天時暑熱打邊爐，天寒地凍食凍甜品，睇吓許留山分店再多都大排長龍就知啦！今日試食兵團決定鏟入元朗試食寶島風味甜品，輕如雪花的棉花冰，絕冇冰粒的凍炒冰，獨一無二的口味及做法，真係凍到牙骱打冷震都抵呀！
記者：盧家蕙
攝影：林栢鈞
Models：Chloe、Ruby、AK
其他團友
甜品狂，每日唔食甜品唔安樂，最愛芒果味甜品。
冇冰粒凍炒冰
聽聞元朗有甜品店會開鑊炒冰，開鑊咁熱，點炒冰？太多問號，由店主Ricky親身解畫：「我見台灣興食炒冰，香港未有人咁整，索性搵人整部炒冰機整炒冰。炒冰機其實是急速冷凍鍋，能於半分鐘內將溫度降到零下40℃，加入鮮榨果汁不斷炒成冰。炒冰講求時間的掌握、力度、拎鏟的手勢，樣樣都好考功夫，唔係話炒就炒。」由於製法特別，加上日日於門口上演炒冰Show，吸引力自然大增：「炒冰係王牌甜品，街坊之外，每逢假日好多港九朋友入來試，仲有長洲、南丫島……」總之多人撐啦！
最愛食甜品，知道邊度有特色甜品食，即使山長水遠都要搭車去食。
香蕉炒冰（前）芒果炒冰（後）各$26
推介指數：10分
入口比雪葩更軟滑，生果味香濃新鮮，滑不溜口，令人悶氣全消，芒果味當然頂呱呱，香蕉味則出奇地討好，甜而不漏。
Chloe：香蕉味好滑，比飲鮮果汁更有風味。
Ruby：估唔到冇冰粒，好食過許多甜品連鎖店！
5分鐘炒冰示範：
自製芒果卷$26
推介指數：9分
大大粒呂宋芒食落不會酸咪咪及有渣，外層包着嫩滑可口的椰汁河粉，一啖一件！
AK：如果有其他生果味會更好！
Chloe：外形極似芒果炸兩，一碟咁多粒，好抵食。
鮮雜果河粉撈$35
推介指數：8分
亁炒牛河生果版，雜果有芒果、奇異金果、木瓜、哈密瓜及西瓜，非常足料，河粉不會太硬，爽滑易入口，足2人份量。
Ruby&Chloe：好抵食，不過河粉椰汁味濃啲更好。
燕窩楊枝甘露$38
推介指數：7分
楊枝甘露口味大眾化，勝在芒果肉及西柚肉夠多，燕窩份量足一湯匙，滿足口腹之慾時，同時養顏，為面子進補。
AK：好食，但貴咗啲。
Ruby：兩隻味唔多夾，好似腥腥哋。
甜心鮮果園（63092296）
地址：元朗安寧路138號地下紫荊樓2期N1舖（安寧路橋底）
營業時間：星期一至五2:30pm至1:00am；星期六、日及公眾假期2:00pm至1:30am
有着數！送黑白水晶凉粉
只要於「甜心鮮果園」食滿$50，即可憑此優惠券換領價值$15的黑白水晶凉粉一客。
*影印本無效
*此為讀者與商戶之私人商業活動，《蘋果日報》一概不負責
*有效期至12月15日
*如有任何爭議，甜心鮮果園保留最終決定權
‧必須憑報紙上的優惠券才可以享有優惠。
輕飄若風的棉花冰
想食台式棉花冰，唔通一定要飛去台灣？綿綿冰店主王小姐，專程遠征台灣學藝一個月，甚至連刨冰機也一併從當地捧回來，一心把台式棉花冰引入元朗。「呢部機同碎冰機好唔同，能將圓柱形的冰柱刨出一小片的薄身冰塊，食落口會好似棉花咁輕身。」王小姐說冰塊是自家製的，每天煲滾幾大鍋熱水，加入果汁粉調開，待凉後再冷凍3日，果汁變實心，咁先可以做棉花冰。
棉花冰有芋頭、草莓、朱古力、芒果等冰底，另有20多款台式配料，仲有煉奶或生果味糖漿你揀，啱晒多心的香港人。單是珍珠已有玫瑰、黃金、翡翠、白雪等，還有3色Q果、海藻珠、愛玉凍、仙草凍等風味十足的配料，包你咬到牙骱軟。
哈密瓜（前）芋頭（中）草莓（後）刨冰各$23
推介指數：10分
綿軟的冰花，入口即化，草莓尤其甜美可人，芋頭偏淡，不過很香滑，沒有吃冰碎的感覺。
Ruby：似有還無的感覺，我鍾意芋頭味，好少食得到。
Chloe：好似棉花咁輕身，食到底都係好綿軟。
刨冰示範：
鮮果紫羅蘭愛玉凍$20
推介指數：6分
愛玉凍即係Jelly，紫羅蘭香花味比較少見，聞落好香，味道偏淡，跟鮮果配着吃也算不錯，感覺很凉爽清新。
AK：雖然特別，但有啲怪味，太香喇。
Ruby：愛玉凍甜少少會更好，香花味幾得意。
珍珠豆腐花$15
推介指數：8分
珍珠屬自家製，色彩豐富，入口QQ的，底層的豆腐花很滑溜，沒有加入太多石膏粉，糖水另外上，可自行調味，很體貼。
Chloe：份量偏大，鍾意食豆腐花的人啱晒。
Ruby：豆腐花幾滑，珍珠使唔使畀咁多？
綿綿冰甜品屋（24709083）
地址：元朗建業街59號慶年大樓3號地舖
營業時間：1:30pm至2:00am（逢星期一休息）