三色台嘅前揸fit人「訂婚」倒戈相向，去咗「AA制」台揸旗，無非為咗向以前成日畀氣佢受嘅七嬸還以顏色。可惜，AA制台點改都打破唔到宿命，訂婚當然好唔忿氣，但最令佢激到爆燈嘅係，AA制台無論設備同資源都同三色台差一大截，佢過到去之後，先至發現要人冇人、要機器冇機器，而且各大小部門做嘢程序亂糟糟，完全冇系統可言，訂婚淨係要執番正都執到氣咳。
原本訂婚最大嗜好就係打麻雀，以前喺三色台嗰陣，一個星期起碼打兩晚耍樂兼減壓，點知過到AA制台之後，由朝到晚唔係忙開會就係忙應酬，呢幾個月嚟連麻雀陣味都未聞過，連發洩都冇機會，又難怪佢呢排心火咁盛，日日都搵人嚟鬧啦！
Textby關仁