星期六商品大王羅杰斯（JimRogers）喺香港出席咗個講座，敏妮因為有嘢做miss咗，但老友A就有去「朝聖」。敏妮唔係講笑，老友A特登帶埋JimRogers嘅著作去攞簽名，據老友A講，JimRogers非常親民，同佢有傾有講，仲喺本書度寫咗句：「Getinthemarketbeforethey'rehot.」畀佢，意思係喺市場未熱烘烘前就要入市。
西環樓多反價封盤
呢句說話觸動敏妮嘅心，因為就喺同一日，敏妮去咗西環睇樓，原因係一位地產前輩知道敏妮近排好留意樓市，又想搵樓，所以就叫敏妮睇吓西環啲樓，話嗰度日後會有地鐵，未來樓價會有得升。對於敏妮呢個九龍人嚟講，港島區一向唔係考慮範圍。雖然有個炒家朋友為咗炒樓，行勻18區睇樓，但敏妮冇佢身家咁厚，亦冇咁多時間，所以都係不熟不搵。
不過，西環對於同一時間搵緊樓嘅公關C嚟講都係目標，敏妮為咗呢個老友，西環樓都奉陪。啱啱過咗個星期六，敏妮喺「地頭蟲」光頭仔安排下，晨早去西環睇咗8、9個盤。雖然有兩三個盤質素唔錯，但樓價有啲貴，地產經紀講：「呢年樓價真係升咗好多，年頭到𠵱家升咗兩成有多，最重要係，好多時講掂業主肯賣，臨到尾佢突然反口。不過，咁都未算麻煩，我哋寧願佢反價，因為反價表示都仲有得傾，最驚佢係封盤，連傾嘅機會都冇。」惟有親身感受，先知道樓市氣氛的確熾熱。
距離hot應仲有一排
敏妮相信樓市正不斷升溫，但距離hot，應該仲有一段日子，套用JimRogers嘅說話，無論作為投資抑或自住，如果要買樓，呢個時候都應該加快步伐，越遲入市，風險將會越高。
http://manlitalk.com/blogs/