一向對國際賽興趣不大，故小弟今日自動「降班」，由主打嘅英冠降為推介英甲，目標球隊係非一般嘅勁旅列斯聯！除咗列斯聯外，國際賽首選為北愛爾蘭對丹麥開「大」，同埋友賽澳洲喺倫敦鬥尼日利亞受讓平/半，下盤起碼執半個！
留力聯賽 史軍有難
國際賽日，筆者注碼例縮，首選財困關係喺季初被扣15分嘅列斯聯；如果唔係扣分，佢哋喺今季聯賽12勝2和1負嘅戰績，已穩做榜首，而唔係𠵱家嘅第7位啦！不過，從佢哋喺英足盃、英聯盃同英錦標（剛在周中出局）等幾項盃賽排弱陣所見，好明顯列斯聯領隊韋斯今季嘅目標，係要即時回升英冠，因此，周六列斯聯迎戰史雲頓，無論係1.53倍嘅單W抑或2.5倍嘅「主勝」，都同樣值博。
列斯聯最煞食係一對今季入球不斷嘅主力前鋒，簡度同碧福特兩人合共攻入球隊逾半入球數目嘅16球，迎戰續缺後衞維辛特嘅中型班史雲頓，實食冇黐牙。
至於歐國外獨選北愛爾蘭迎丹麥呢場生死戰，由於兩隊喺數字上仲有出線機會，今役必全力爭勝，預料入球唔會少，買「大」頗穩。由於同組1、2名瑞典同西班牙嘅對壘，係遲過北愛呢場75分鐘先開賽，所以唔理得西、瑞戰咁多，必先互攻鬥個你死我活。而馬會呢場開出丹麥[-1]頗狠，信莊家博多一注1.95客W。
澳洲友賽交到貨
另外，早場捧踢友賽一向唔多留力嘅澳洲，而今役對手尼日利亞則陣容頗殘，加上比賽喺倫敦嘅小屋球場踢，效力英超球隊嘅澳洲腳好似門將舒華沙中場基維爾等，可以話有半個主場之利，受讓平/半，下盤筍。而《賭blog日記》下周由牽牛主打一周，請大家繼續捧場。
近5場往績：贏輸走輸輸
蘋果波神
股市大旺，英超盛世，大家齊來贏多啲！