中大政治與行政學系有人事變動，被視為中南海智囊嘅講座教授王紹光，明年1月會接替PeterPreston做系主任。王紹光喺內地學術界享負盛名，研究著作甚受重視。
王紹光日後地位可能更重要，事關佢同中共上位「新星」、新任政治局常委李克強係北京大學同學，李克強日後更上層樓，王教授地位亦不可同日而語。兩人係北大法律系同學，畢業後選擇唔同出路，李克強做官，王紹光出國留學，幾十年後殊途同歸。
曾任教耶魯大學
據中大學者透露，系主任由校長委任，但並非「欽點」，會經社會科學院院長逐一諮詢學系成員後先決定。由於中大傳統上較重視學術成就，故政政系主任人選屈指可數，現任系主任PeterPreston同王紹光叮噹馬頭。王教授喺北大畢業後去美國康乃爾大學留學，先後取得政治學碩士同博士，又曾喺美國耶魯大學任教，有教授指佢做系主任實至名歸，同領導人關係好係錦上添花。
王紹光有任教少數科目，主要指導碩士、博士生，好多內地生慕名到中大追隨佢。上一代中大政政系有唔少台灣學者，𠵱家內地學人佔多，有教授表示，此消彼長係因為台灣學術界好活躍，當地政治學者不愁發展，何必離鄉別井？