憑《溏心風暴》大契一角成為今晚台慶頒獎禮視后大熱的李司棋，近日頻頻獲熱心街坊打氣，支持她攞獎，令司棋姐也不禁心情緊張起來。不過，年前鄧萃雯大熱倒灶的先例，令司棋姐的攞獎信心跌至6、7成，她笑說：「如果宣佈嗰陣唔係我，咁咪會好尷尬？」
李司棋憑無綫劇集《溏心風暴》中的大契角色，再攀事業高峯，她在劇中的精警金句，道盡人生道理，贏盡全港觀眾歡心，今晚的《萬千星輝頒獎典禮》最佳女主角獎，幾乎可說是司棋姐的囊中物。
問到司棋姐臨近頒獎禮心情如何？她日前接受訪問時笑說：「離開TVB多年，唔知台慶要緊張啲乜嘢，之前冇參與過，本來我唔係好識緊張，唔係太覺得我需要攞呢個獎，但日子近個個都咁講，身邊個個都好緊張，自己自然都會變得緊張。」
愛女打氣心甜
司棋姐表示近日走在街上，不少市民紛紛為她打氣，令她十分感動，她說：「出到街好多人都話支持我，有次食飯，有個人仲話想投我一票，問我去邊度投票，我家姐話聽講要去郵政局，後來先知道唔係。跟住有次坐的士，個司機又話支持我；去買嘢，睇嚟睇去都睇唔啱，個sales話：『唔緊要，我投咗你一票，你努力呀！』個個都咁講，所以你話係咪會搞到我都緊張埋一份。」外界的期望對她形成壓力？司棋姐直認不諱：「少少啦！其實開心嘅，人人咁講你就會飄飄然，但如果宣佈嗰陣唔係我，咁咪會好尷尬？」
除街坊為司棋姐打氣外，她的愛女葉子青也有透過電話給予母親支持，令司棋姐甜到入心入肺，她說：「佢好多時都有問我：『你今年係咪攞㗎？有乜準備呀？』搞到我都緊張埋一份。」司棋姐指子青因工作忙碌未能來港為她打氣，當記者笑指子青或會忽然現身給她驚喜時，司棋姐雖然口口聲聲說：「唔會啦！」但言語間仍閃過一絲期望。
讚關菊英夠奸
不過緊張還緊張，問司棋姐對摘下視后桂冠有多大信心時，她竟因早年鄧萃雯大熱倒灶一事前車可鑑，令攞獎信心跌至只得6、7成，司棋姐說：「有好多嘢好難講，萬一宣佈唔係我，有幾多信心都係假，我見人哋試過㗎啦，好似雯女咁，嗰年好多人都話佢攞，個個都話佢係大熱，結果出嚟又唔係，有人同我講：『如果今年唔係你，啲人實嘈到拆天！』真係好多謝大家咁睇好我，好在𠵱家我好忙，如果唔係實瞓唔着覺。」
芸芸視后候選人中，覺得那幾個是勁敵？司棋姐說：「我唔知，我冇乜睇過其他戲，但我睇過《師奶兵團》，覺得雯女佢哋幾個女主角都做得幾好。細契關菊英都有可能，細契做得好好，曾經有傳媒問我，如果揀最突出女藝人會揀邊個，我話一定係公仔（關菊英），因為佢咁多年冇拍戲，以前又唔係拍咁多戲，行到鏡頭前做個咁嘅角色，一做就做得咁好，係好突出、好難，做咗好多年戲嘅都未必交到咁嘅功力出嚟，因為好多人一做反派就收晒，怕做衰自己，但公仔唔係，佢好認真，交到十足。」
睇好陳豪稱帝
至於最佳男主角方面，司棋姐表示睇好《溏心風暴》的得得地陳豪，她說：「佢咁辛苦，應得嘅，佢啲戲好穩陣，人品又好，又唔是非。」
採訪：戴彩煥 攝影：林德雄
最佳女主角獎候選名單
‧汪明荃 提名作品：《東方之珠》
‧佘詩曼 提名作品：《東方之珠》
‧宣萱 提名作品：《賭場風雲》
‧楊怡 提名作品：《賭場風雲》
‧米雪 提名作品：《突圍行動》
‧楊思琦 提名作品：《突圍行動》
‧胡杏兒 提名作品：《亂世佳人》
‧李司棋 提名作品：《溏心風暴》
‧關菊英 提名作品：《溏心風暴》
‧鍾嘉欣 提名作品：《溏心風暴》
‧鄧萃雯 提名作品：《師奶兵團》
‧商天娥 提名作品：《師奶兵團》
‧郭羨妮 提名作品：《學警出更》
‧伍詠薇 提名作品：《緣來自有機》
‧陳敏之 提名作品：《強劍》
‧廖碧兒 提名作品：《舞動全城》
‧徐子珊 提名作品：《舞動全城》
‧葉童 提名作品：《奸人堅》
‧蒙嘉慧 提名作品：《通天幹探》
‧黎姿 提名作品：《通天幹探》
資料來源：無綫電視
拆局：溏心家族發威
今晚台慶頒獎禮最佳女主角獎將是李司棋囊中物，最佳男主角大熱則是陳豪，夏雨和關菊英則有望奪我最喜愛的電視男、女角色獎。最佳男配角以阮兆祥勝算最高，次熱為王祖藍，最佳女配角將是陳法拉和梁靖琪之爭。
另外，廖碧兒被視為飛躍進步女藝員大熱，飛躍進步男藝員則是王祖藍和崔建邦之爭，而最佳節目主持大熱則是庾澄慶和鄧健泓。至於內地觀眾最喜愛TVB男、女藝人獎，相信會由林峯和黎姿奪得。
