數碼廣播下月正式登場，亞視噚日率先舉行節目巡禮，由董事兼營運總裁何定鈞帶隊，拖埋七個數碼天使出場，仲「唔覺意」爆埋自己「贏」咗無綫㖭！
亞視「二奶台」命運幾十年不變，亞視高層噚日話，廣管局定咗數碼電視台號用兩位數，前幾日幾個電視台去為LCN（LogicalChannelNumber，即係數碼電視頻道號碼）抽籤，爭崩頭嘅1字頭落在亞視手上，咁即係話日後開台，亞視數碼頻道就由11台、12台數起，1字再唔係無綫「專用」，開機時亦會睇到亞視先！
至於TVB冇咗第「1」，惟有要8字頭。何定鈞話今次係抱住非1不要嘅心態去抽，終於心想事成，可能代表亞視有運行嘞。