一位攻讀市場學（亦稱營銷學Marketing）嘅世姪，向左丁山請教實戰經驗。左丁山邊度識得咁多吖，對Marketing嘅認識，限於Kotler教授嘅經典名著《MarketingManagement》，一啲雜書，及讀過幾次嘅《MarketingWarfare》（AlRies及JackTrout著）事實上，自己從未真正做過marketing。
於是代佢問吓專家。營銷L喺二十幾年前加入跨國公司做市場推廣，公司以豪氣廣告，捨得出錢著名。但係上班頭三個月，日常工作就係睇報紙，全港中英文報紙睇晒。營銷L對左丁山講：「嗰陣時幾乎想辭工，有冇搞錯呀，我喺美國讀完大學返嚟，上司叫我日日睇報紙，同埋剪低一啲我認為啱用嘅新聞報道及文章，佢又唔講明剪邊類新聞噃，任我剪，交晒畀佢睇，悶到我抽筋。」卒之呢？三個月後，上司對營銷L講：「最近兩星期你剪啲新聞及文章，全部對辦，你𠵱家明白到邊啲新聞對我哋公司及產品有參考價值嘞，證明你有領悟力。以後一個月，你日日出街到油尖旺區實地推銷、送貨及核查出售我哋產品嘅街邊攤檔嘅銷售紀錄。」
營銷L話佢日日到油尖旺街頭行嚟行去，費盡唇舌，先知道市場理論要活學活用，產品如何擺放先至吸引到顧客注目，點解街邊客人買其他牌子而唔買佢哋公司牌子，以及攤檔擺賣嘅好多限制。一個月油尖旺街頭經驗，令佢信心大增，向上司要求調派其他任務，上司派佢去新界下鄉，騎單車送貨到每一條村嘅士多。一次佢被士多老闆整蠱，叫佢同時送埋兩罐石油氣，營銷L控制唔到架單車，跌咗落菜田，而菜田上有好多有機肥田料，營銷L話冲凉三次，仍然聞到身上嘅臭味！經過五個月考驗，上司調佢返公司總部，負責市場計劃工作，佢先知道唔會閉門造車，低估前線人員嘅困難，以及好明白分銷、支援嘅重要性。二十幾年來，佢在公司一路升級，足跡遍東南亞，某年佢在新加坡叫一位新畢業嘅大學生上街推銷，新人在街邊釘廣告板，撞到祖母行過，阿嫲幾乎喊出嚟：「陰功咯，畀錢個孫去美國讀書，佢返嚟喺街邊釘板！」第二日，位新人辭職。營銷L話：「大概我哋套訓練方法out晒咯！」