穌哥、驅魔人、基督教黃子華同體的搞鬼牧師林以諾，預備了大堆Talkshow問題，正要傳給施永青，對方竟然拒絕：「你畀我睇咪要預備，預備了就唔真，我要真情流露，唔想後悔！」倪匡更兜口兜面：「你畀我都唔睇！」玩死牧師，面對3,000觀眾全玩即興？《老子‧耶穌‧衞斯理》TalkShow已經爆咗，但三位「得道」高人，今日就率先將《蘋果》當道場，如是我聞……更快得道！
記者：馮敏兒
攝影：陳陶鈞、馮敏兒
《以諾檔案之老子‧耶穌‧衞斯理》11月23日在會展舉行，3,000座位全部爆滿，而林以諾承諾會盡快出版DVD以作補償。
節目查詢：24333073
廁所老子中原教主
從他開口，到聽道完畢，施永青都是非常原則，中原地產連大陸共二萬員工，個個封他做偶像，崇拜有加，「中原教主」不務正業，卻盡得下屬歡心。
馬仔指派中原教主
「我好少叫我啲馬做嘢，通常係馬叫我做嘢，我當然要支持啲馬做嘢！」施永青點答記者問題都要問過佢隻馬！對方還在電話中跟他說：「唔好亂答，當貪過癮喇！」佢大聲複述，轉頭：「我『無為』嘛，怎會搵單咁嘅搞？《am730》同林以諾合辦，話可以擦出火花。」一介道士，孤身獨闖基督王國，竟然是馬仔指派！
廁所得道
那次教主屎急：「我情急之下在書架上亂抽一本書，結果胡裏胡塗抽了老子進去，竟在廁所中『得道』！」17年前佢拿錯了一本《道德經》，堂堂「中原教主」就這樣得道：「我信的是天道，道無所不在，沒有具體形式。不一定在廁所先悟到，只是我啱啱如廁。世界規律以不同形式出現，古往今來，四海如一。」他引用《聖經》：神的旨意行在地上如同行在天上。「我崇尚自然，道是張大嘴有嘢流出來就流。」
4間小學 3間中學
「『講耶穌』在香港是貶詞，即是用好死板的方法，講一些大家都明白的道理。牧師好叻，所以佢一定會想我幫佢傳道。」但你竟然空槍上陣？「邊個話我空槍上陣，細個時校長常這樣罵我，我絕不接受，我三歲時就已經開始準備，不會隨便被人擺佈。結果我讀過4間小學，3間中學，次次考試都發覺老師出錯題目，咁你叫我點答？」老子曰：「反者，道之動。」佢話唔想幫仔女做功課，唔識就回去告訴老師唔識，老子話：「知不知，上」，知道自己有所不知，就是實情，「無為」就是不強求。但佢仔女唔聽佢支笛！
冇胃病就唔好食胃藥
「我真係相信『無為』。有否留意中原地產的分行開到亂七八糟，正因為我唔知，所以就亂開，我不相信規劃，光禿禿石頭山變出山林，就因為一棵種子的偶然，自然成長。我不會為未出現的東西做預防，大部份為將來的打算都是浪費。我頭痛醫頭，腳痛醫腳，冇胃病就唔好食胃藥。」佢連保險都唔買，也不會把遺產留給仔女：「下一代有責任自己生存，最怕佢哋太『有為』搞生意，家產敗得更快。把公司上市也是『有為』，突然給你一筆錢，到頭來幾多公司上市後一敗塗地。走投無路才做生意，我不過死好命。」
中原完在我手
中原教主的格言是：「誰以為自己全知，就會搞偉大工程，要大家跟隨，否則鬥垮鬥臭！其實大家所能做都好有限，我們要有必需要的無知。」
「人精神的最自然狀態是不斷游離，唔集中精神就是橫向思維，游離時就會見到上帝。大道其實好簡單，唔行捷徑，好快就到。中原中原，終有一日會『完』。完在我手裏更正！」
後現代腦震盪神學
明知倒貼10多萬元，「笑林絕學——動篤笑」掌門人林以諾都要搞，難道佢又想借題發揮「講耶穌」，外星人儒道佛一家親？「我唔想大家有一個共通的面，我全沒嘗試下這種結論，我只想給大家來次腦震盪。」佢認為後現代社會沒興趣統一口徑！「好想將你變成我，才是最大問題。」佢話如果我們還抱着現代主義的絕對觀，講邏輯，唔講feel，事事諗清楚先去做，肯定死得。「我們實實在在地生活在後現代的浪潮中，一切講feel，愛聽故事，絕對真理？睬你都儍。《舊約聖經》大部份都是上帝講故事，只叫人明白，從沒有結論。」
三大高人為所欲為
其實三位高人都唔多認識，平生也不過見了幾次面，倪匡信咗上帝還情有可原，老子後人會否虛無縹緲，哦忘記了主題是人生管理，唔係穌哥佈道大會，他不過以自己的「有為」和「有所不為」，對碰施永青的「無為」、還有倪匡的「無所為」。「一個腦轉速奇快，卻不唯利是圖；一個唔講金，冇機心，冇人生目標，更冇西方管理哲學那一套mission（使命）和vision（夢想）。」
搞掂《聖經》話咁易
《衞斯理》林牧師自細睇到大，津津有味，但前三分二作品都跟佢的信仰背離，《無名髮》更把4大宗教說成都是外星人的講法，佢反駁：「所有宗教導人向善，殊途同歸，都是非常粗糙幼稚的宗教觀，其實4大宗教冇乜共通點，可以對話的地方唔多，同枱食飯一個食齋，一個食肉；一個作嘔，一個冇癮！」但無論如何他對本門充滿信心，「要拆《聖經》台好簡單，只要推翻《聖經》是上帝的啓示的可信性，證明耶穌復活是假的，咁就玩完，但至今沒有一個人成功過。」雖然一切都來自《聖經》，但牧師認為神學是另一回事，只對應特定的時空，「解放神學」、「環保神學」、「婦女神學」時辰未到，但林牧師的「棟篤笑神學」則肯定啱啱好。
缺席聆訊衞斯理
林以諾邀請倪匡登台，倪匡：「我要同上帝祈禱先答你。」跟住佢一邊談話，一邊祈禱，半小時後就接受了他的邀請，林牧師同記者一樣對他老人家冇晒符，竟「怕醜」唔肯接受訪問，結果促成缺席聆訊衞斯理！或者因為記者冇林牧師「咁得意！」
外星神學
施永青老實不客氣：「我唔睇衞斯理，我對過度幻想的東西冇興趣。」倪匡就話：「道教和禪宗比較虛無縹緲。」佢又同林牧師話自己唔適合返教會，唔適合傳道，但佢信得認真。最重要還是倪匡的插科打諢，爆炸力驚人，數日前佢在《斑馬在線》講：「如果韋小寶是漢奸，所有97前的公務員都是漢奸！」林牧師過癮死了。我翻開《另類聊法》錄影訪問，倪匡說當年為戒酒找牧師，點知牧師同佢講：「上帝已經冇行神迹好耐喇！」結果倪匡不但第一次祈禱就同上帝「搭通天地」，還行了最大的神迹，一下子把煙酒戒掉。
開心快活無所為
林牧師總結：「社會上很多像倪匡『無所為』的人，只求活得開心，甚麼人生目標、使命和夢想對倪匡這種人太沉重了吧。但這種人在商業社會沒甚麼出路，偏偏倪匡又好掂，佢唔鍾意就唔鍾意，又唔驚得罪你，唔會買你怕。」時間管理更勁，可以用3小時靜看花開，不過佢想睇到時針跳，卻一次都未成功過。
