被八方譽為「四朵警花」之一、烹飪高手方太個女兒方安妮噚日朝早8點鐘有行動，不過唔係揸槍或揸鑊鏟，而係為公益，佢一身黑色跑步裝出場，一聲號令，170名PTU（機動部隊）警員好似支箭咁衝，由石硤尾南山邨道嘅西九龍機動部隊行動基地出發，環繞桃源街、達之路、歌和老街、南昌街，經盲人中心折返基地，全長三公里，最快嘅師兄11分鐘內跑畢。
今次跑步慈善賽係幫香港盲人輔導會視障及智障人士籌款，成功籌得74,000蚊，成績十分唔錯。方安妮係西九龍警察機動部隊B大隊指揮官，早前喺尖沙嘴重慶大廈一帶進行反非法入境者行動建功，今次身先士卒落場跑，成班夥計士氣高昂。