無綫台慶將於下星期一舉行，一眾女演員近日都忙於挑選性感戰衣以及名貴鑽飾，另一邊有位仁兄都忙於另一個台慶─《萬千師奶賀台慶》。不是無綫合約演員的詹瑞文早前因為扮演港姐及無綫高層而被列入黑名單，阿詹無懼這張根本對他沒有阻嚇作用的黑名單，日前繼續以港姐造型拍攝新一輯宣傳照。
日前詹瑞文租了一架古董勞斯萊斯配以一張紅地毯，加上其高貴港姐造型，為《萬千師奶賀台慶》拍宣傳照，他還帶備了三個不同顏色的假髮及朱義盛鑽飾，他笑言：「咁人哋嘅台慶都進行得如火如荼，啲演員個個都搵衫搵珠寶sponsor，我都要set得『行』啲贈一贈興啦，我自己都有一個賀台慶㗎。」
台慶鬧劇求其
繼阿詹早前指摘無綫身為大台但無大將之風後，導演杜琪峯又指陳志雲為「騎呢怪」，對此阿詹說：「杜Sir可能係無綫出身，所以佢先有咁深體會，先會講得咁激，但我絕對認同𠵱家啲電視劇真係冇創意。」
阿詹表示近日為了《萬千師奶賀台慶》看了不少無綫以往的台慶及現時播放的劇集，他指當中有不少表演都好「求其」，他說：「我睇番之前台慶啲碟，發覺當中最流就係鬧劇嘅一part，編劇有編劇寫個古仔，演員有演員自己做，都唔知做乜，其實係咪可以做好啲呢？但係往往觀眾就係最鍾意睇呢一part，呢啲咪係香港奇怪嘅電視文化囉。」
「對白笑死人」
另外，阿詹指有一晚於家中抽時間欣賞《通天幹探》，發現當中有些對白十分過時而且不合理，他笑說：「嗰幕講黎姿同鄭嘉穎去新加坡傾生意，當中佢哋同當地老闆講嗰啲對白真係笑死人，根本現實中都唔會咁樣傾生意，咁都過到骨，點解個編劇同導演可以接受㗎？總之香港觀眾你畀乜嘢佢睇咪睇囉！由細到大都係咁㗎啦，電視汁撈飯。」
最後阿詹再次強調今次舞台劇絕不是一個模仿騷，他的故事是想帶出電視台、電視劇對香港人的影響。
採訪：李珮洳 攝影：葉君海
