網球壇靚女舒拉寶娃噚日嚟咗香港，仲同古天樂一齊幫名錶TAGheuer專門店做開幕嘉賓。擔任香港區代言人嘅古仔，一見舒娃就即刻獻花，仲介紹佢一定要去飲茶同食點心。
請教狂呼絕技
之後古仔同舒娃又打手印留念，不過唔知係咪晨早起身隻眼太亁，馮仁昭發現古仔隻「大眼仔」隱形眼鏡移晒位，搞到佢好似淚眼汪汪咁。後來古仔同記者傾偈，佢話第一次見舒娃，覺得佢成個模特兒咁，如果係大鄉里，真係分分鐘唔知佢就係世界排名第五嘅網球高手。古仔又好搞笑咁話𠵱家全民炒股，都應該向舒娃介紹一下呢個咁特別嘅潮流喎。
講吓講吓，古仔話自己都有打吓網球，但就唔明點解靚女舒娃開波同底線抽擊時要咁肉緊大叫喎。佢又話都有照辦煮碗大叫，但就冇乜效果，所以會趁大好機會向呢位靚女請教請教。
