黃梅調歌后靜婷下周將緊接林憶蓮於九龍灣StarHall開騷，今次除有鼻音歌后吳鶯音擔任嘉賓外，兩位歌后更會藉歌聲向昔日作曲家及作詞家致敬，其中吳大姐將會送上她首本名曲《我有一段情》，以紀念上月逝世的殿堂級作詞家陳蝶衣。
著名作詞人陳蝶衣上月病逝，享年99歲。陳蝶衣筆下經典金曲多如天上繁星，除了《情人的眼淚》、《春風吻上我的臉》和《香格里拉》等外，吳鶯音的首本名曲《我有一段情》也是他得意之作。只是這首金曲背後，埋藏了一段痛苦回憶。1957年，吳大姐由上海申請來港收取百代版稅，順道錄歌，包括姚敏作曲、陳蝶衣填詞的《我有一段情》，豈料吳大姐返回上海多年後，文化大革命爆發，吳大姐因為來港錄歌而被清算批鬥，陳蝶衣深覺害苦了吳大姐而自責不已。
日前記者與吳大姐和靜婷姐茶敍，談及這件陳年往事，吳大姐笑說：「其實唔關佢事，係佢哋（當年政府）懷疑我係特務，所以咁做。我覺得《我有一段情》呢首歌好好聽，歌詞寫得好好；以前我喺上海同周璇、姚莉一齊唱歌嘅時候就認識佢，覺得佢好有才華、個人好實在。」
「只係剩番顧嘉煇」
入行數十年的靜婷姐，也跟陳蝶衣合作無數，談到昔日合作過的音樂人一個一個離世，靜婷姐百般感慨：「以前同我合作過嗰班作曲家作詞家，本來剩番陳蝶衣同顧嘉煇，但𠵱家只係剩番顧嘉煇一個！陳蝶衣嘅才華唔輪到我去講，但佢寫嘅詞真係寫得好好，佢亦寫過好多歌畀我，佢94年最後一首《梁祝》都係寫畀我唱。今次我喺演唱會向一班作曲作詞前輩致敬，唱佢哋嘅歌，其實唔止為紀念陳蝶衣，而係因為人哋往往只記得我哋唱過乜嘢，但一班幕後功臣就完全唔記得，甚至唔認識，我覺得係需要做呢樣嘢，再唔做，第日仲更加冇人去做。」
水土不服曾入院
本月23日至25日，靜婷姐將於九龍灣國際展貿中心StarHall舉行「靜聽．靜婷演唱會」，85歲的吳大姐專程由美國返港擔任演唱會嘉賓，絕對是畀足面子，吳大姐笑道：「以前佢都幫過我好多次，有次我本來喺海城唱，點知俾部手推車撞倒，跌斷咗隻右手唱唔到，都係佢幫我唱。」不過，吳大姐今次返港，一落機便因為水土不服而入院吊鹽水吊足三日，幸經醫生診治後已康復得七七八八，未致影響下周演出。
採訪：戴彩煥 攝影：陳慧安
