聽日就係區議會選舉投票日，四年前有7.1效應，民主派贏到開巷，今年形勢低迷，民主派輸少當贏。左右選情嘅因素，分分鐘唔係雙普選、地區民生、左派抹黑或北京打壓等問題，而可能係萬千里外嘅一場波。呢場隨時影響民主派勝負嘅球賽，就係周日凌晨兩點開場嘅歐洲國家盃E組外圍賽，以色列對俄羅斯。
呢場波咁關鍵，係因為涉及香港前祖家英格蘭前途。英格蘭正同俄羅斯爭奪小組出線權，若俄羅斯贏波，英格蘭就算踢埋下場贏波，都要行人止步；反之如果俄羅斯輸波，英格蘭只要下場贏波，就可以晉身16強。
贏輸牽動拉票心情
香港雖已回歸，但好多人仍心繫前祖家，因此英格蘭擁躉眾多，政壇中人，尤其係民主派好似馬丁、陶君行等人，幾乎一面倒係英格蘭球迷，所以大家求神拜佛都希望以色列贏波，等英格蘭有最後一線希望晉級，否則大家齊齊哭波喪，仲邊有心情拉票吖。民主黨張文光話，呢場波事關重大，就算俾人指佢勾結外部勢力都一定要睇，由於近日忙於幫兄弟助選，身心俱疲，如果俄羅斯贏波，英格蘭出局，加埋選舉勢危，真係雙重打擊。
陶君行選情緊湊，但都費神牽掛英格蘭命運，佢話最衰英格蘭領隊麥卡倫唔掂，之前連場敗北，作客俄羅斯又輸波，結果陷入困境，𠵱家形勢凶險，有球迷叫麥卡倫返鄉下耕田都唔係冇道理。陶君行好坦白講話唔睇好英格蘭前途，更笑言英格蘭出局，搞到佢拉票都冇乜心機。英格蘭球迷打定輸數，事關以色列輸贏無所謂，打算派副選上陣；俄羅斯則有車路士班主阿巴莫域治出重賞，話只要贏波，每個球員有160萬港幣獎金！
英格蘭出線機會牽動民主派選情，民主派輸到一仆一碌今勻唔使賴地硬，可以賴波係圓嘅，不過最傷嘅可能係「真民主」小小超李澤楷。香港人幾乎全民皆捧英格蘭，所以now重鎚獨家買入歐洲國家盃決賽周轉播權，𠵱家英格蘭出局在望，對球迷而言安裝now嘅吸引力驟減，慳番筆錢好過，所以全港最肉緊嘅應該係「真民主」，為咗香港有民主，八方做埋啦啦隊，以色列一定要贏波呀！