張栢芝昨晚復工為MiuMiu開幕禮撐場，談到兒子Lucas時開心不已，但她否認月花十萬養子，不過兒子靚衫的確多得穿不完。全面復工的她，承認在電影合約加入保障她懷孕停工的新條文，為將來再追生做足準備。
意國名牌MiuMiu位於銅鑼灣利園二期的新專門店，昨晚舉行開幕禮，請來張栢芝、台灣氣質美女桂綸鎂及婚後首度露面的張燊悅等。張栢芝自為謝霆鋒生下兒子謝振軒（Lucas）後，近期積極收身復出搵奶粉錢，她穿上MiuMiu短袖連身裙，手挽價值5,500元的新店限量版金袋現身，明顯收身成功，但聲音沙啞。她一見記者就喊冷說：「好凍，生完之後好少着短袖衫。」問她今次可是酬勞極好？她說：「我成日着呢個品牌嘅衫，所以冇計酬勞。」
否認十萬養兒子
提到有報道指栢芝月花十萬元谷肥Lucas，她說：「冇咁嘅需要，唔使谷佢都好肥仔，因為佢太吸收，佢都係食正常奶粉。冇十萬咁多，好多名貴嘅衫、鞋都係朋友送，好多着唔晒，有時唔出街，都要嘥時間，早午晚同佢襯乜嘢衫，喺屋企換衫影相留念。」她透露兒子現時重16磅，問到養一個孩子是否要400萬？她說：「平有平養，貴有貴養啫，之前努力工作，都係為計劃將來。」
張栢芝表示以後工作會多考慮時間安排，她又謂有電影劇本研究中，提到有指她在電影合約中加入新條件，若拍攝期間懷孕，有權停工生仔後再復拍，栢芝默認說：「其實呢點都係維護投資者，有條文講清楚，對大家都公平。」栢芝逗留半小時便離開，沒有見到專誠捧場的姨仔謝婷婷。
桂綸鎂安慰周董
此外，問到桂綸鎂失落金馬獎提名，她說：「我做得還未夠好，我還有進步的空間，觀眾喜歡我的角色就夠了。」但她對周杰倫沒入圍感到失望，也有傳短訊安慰對方，她說：「我寫了『你已經做了自己的夢想，不用介意獎的部份。』」
採訪：RitaLeung
攝影：RickyChan
樂基兒提早收爐
MiuMiu號召下，中港名模琦琦、周汶錡、樂基兒、熊黛林、貝安琪、AnaR.、MandyLieu、裴蓓等昨晚傾巢撐場。樂基兒透露昨日將是她今年最後一個工作，現於演藝學院讀藝術課程的她說：「我由12月至下年4月唔會工作，因為要專心準備下年底畢業嘅功課。我做完呢個job之後就會放大假，返美國休息幾個星期。」收埋自己，莫非準備結婚生仔？她笑說：「no！no！no！」不開工沒收入，男友黎明可會幫補她生活費？她說：「唔使，我自己有儲蓄。」此外，MiuMiu特別為新店推出金色百褶晚裝袋，全球限量50個，售價$5,500。
