大陸電訊業高層喺04年大執位，當時王建宙（圖）由聯通（762）調任到中移動（941）做董事長兼行政總裁，眨吓眼咁就過咗3年。噚日王建宙出席香港總商會論壇，提到中移動能晉身成為全球最大電訊商，佢話係夢寐以求。
冀優勢持續
講到興起，佢仲想當年話，回憶起中國最早嘅電話局，係1882年由丹麥電話公司喺上海建立，100年後嘅1982年，中國電話用戶人數都係得234萬戶，連豆膶咁細嘅香港都不如。80年代初期，電話喺內地嚴重短缺，要等幾年先可以裝到一部，嗰時佢就諗，幾時先可以唔使排隊。
想唔到短短25年，內地電訊業急促發展，𠵱家全國流動電話人數達5億戶，中移動亦成為電訊業界內，市值、用戶人數同網絡規模嘅一哥，如果論收入就排第11位，論盈利就排第3，主要因為投資者睇好中國高速發展前景。
不過，他自謙唔好以為排第一就好巴閉，因為都要靠龐大市場優越條件先得，佢希望呢啲優勢可以持久落去。