「小時候住在福建鄉間，每天早餐吃番薯粥，都不知幾咁討厭，你知，食得龍肉多都無味，更何況係番薯！人越大，逐漸覺得番薯粥嗒落幾有『味』，𠵱家食少日都唔得！」真真美食店廚師兼店長吳先生笑稱。
吳家一向以務農為生，鄉下地方邊有珍饈百味，又粗生又飽肚的番薯自然成為主糧。「雖然福建的番薯唔出名，但我們主要用番薯做粥、饅頭等，總之家家戶戶每朝必定食番薯，到今時今日，我們生活有改善，還是繼續食這款『傳統早餐』。」
對於吳先生而言，甚麼佳餚美食也比不上一碗由家人炮製的番薯粥。「番薯粥對我有特別意義，可以話係我的童年回憶。我好懷念鄉間那些純樸、平靜的生活，簡簡單單已經好幸福、好開心！每次食番薯粥，我也會提醒自己，不要追求太多的慾望，食得瞓得，夠錢使已經好幸福！」而且吳先生認為可能係前人的智慧，以這麼有營養的食材做早餐，食完精神會特別好，亦能排走體內的毒素，可謂一舉兩得。
記者：洪偉順
攝影：陳盛臣
番薯粥$8（a）
番薯鮮甜，可配菜脯炒蛋、豆芽菜等伴吃。番薯含豐富營養，熱量低，是減肥恩物。
麵線糊$15（a）
麵線直接從福建買回來，把麵線放進冷水煮，滾後以生粉埋芡，再放蠔仔、鮮魷魚及炸豬肉等，口感滑溜鮮甜。
（左）上包$2、（右）發糕$3.5（b）
上包以炒香的花生及糖作餡，甜而不膩；發糕則將番薯加入發酵麵粉一齊蒸熟，味道甘甜，口感鬆軟。
（a）真真美食店（25030976）
地址：北角春秧街72號B舖
（b）順寶（25716233）
地址：北角糖水道5至7號I舖