15/11/2007.....
天晴
最新動態
不經不覺有線呢個以足球為主打嘅收費台已陪我同度過13個年頭，計死數，若果當初屋企唔裝有線，每月平均交250蚊月費計攞去逐年投資，回報率5厘，𠵱家可以收番5萬幾銀。當然快樂無價，佢哋播英超時嘅盛勢，播世界盃嘅創新意念，令我印象深刻，加上自己當年工作所需，一度沉醉賭馬睇實18台嘅晨操，睇「方世玉」畀準繩嘅貼士，二百幾蚊月費一啲都唔覺得貴。
可惜，市場上有咗另一個不惜工本嘅「現在」台，重金搶去最值錢嘅英超播映權外，仲有好多荷李活猛片睇，同好多靚女主持嘅財經台及新聞台；加埋自己鐘意睇無記收費台嘅荷甲同英冠，寓工作於賭博，唔返工都可以睇十幾個鍾頭收費電視，貪新忘舊，也是正常不過。
賭本有限時間有限，18台也少睇了；冇英超播，繳付自由身合約近300蚊嘅月費，簡直係考驗我對佢哋嘅忍耐力，但連明年夏天嘅歐國盃決賽周都俾對家撬埋（雖然英格蘭應該冇份踢），cut台麻煩，也係時候自我鬆綁嘞。
蘋果波神
股市大旺，英超盛世，大家齊來贏多啲！
http://hk.myblog.yahoo.com/footballexperts/
逢周一至五見報