大富豪喺紐約蘇富比拍賣會買入高更PaulGauguin名畫《早晨》TePoipoi，作價三千九百二十四萬一千美元，成為新聞。其實真正嘅新聞係拍賣會嘅收入低於預期，梵高嘅死前作品《麥田》與畢加索、莫內、馬蒂斯以及高更一啲畫作賣唔出，反映出美國富豪在次按危機未消除嘅情況下，怯於掃貨。賣得出嘅藝術品，八成由亞洲人買入，蘇富比喺未來一兩年，不如將啲珍貴藏品移到香港做展銷會，方便亞洲富豪。
高更幅《早晨》原本估價係四千萬至六千萬美元，現在以低於下限價成交，唔怪得大富豪話抵買。富豪買入油畫等升值，用嘅係濕碎錢啫，炒供求之嘛，名貴油畫只得一幅，而股票可以隨時印出嚟，有耐力嘅話，買名畫鎖埋二三十年，一定升值。
富豪Ｐ唔買名畫，鍾意買馬。啲名種馬近年搶得好貴好貴，等閒馬主只能望馬興嘆。上星期一，美國肯得基（Kentucky）州嘅名種馬拍賣所在地堅蘭（Keeneland）創下一項近年紀錄，杜拜麥通酋長以一千五百萬美元買入一隻五歲馬女PlayfulAct，震驚世界馬壇。呢隻馬係名種Sadler'sWells之後，出自著名嘅愛爾蘭SwettenhamStud，由已故大馬主RobertSangster（桑士打）擁有。桑士打於一九八五年以一千三百一十萬美元買入周歲馬SeattleDancer，至今保持呢項世界紀錄，第二名係二○○六年九月肯蘭拍賣會賣出嘅Kingmambo子嗣，售價一千一百七十萬美元。
用過千萬美元買一隻馬，風險極大。名畫收藏得耐，升值機會好高，但係配種馬，無論雄馬或雌馬，其價值可能會隨年齡而貶值，或者因為生出嚟嘅子女表現不佳而貶值，故此內含賭博成份，唔係一定贏梗。
富豪Ｐ將啲拍賣資料電郵過嚟，大概係想教育吓左丁山唔好坐井觀天，以為香港馬主用三四百萬港紙買馬，就以為好貴，其實在國際市場，四五十萬美元一隻馬，根本不放在中東歐美大馬主眼內。