蝙蝠俠來港拍外景，特區政府部門全力配合，上星期一凌晨時份甚至封路到六點（近中環中心一截皇后大道中），等蝙蝠俠可以順利拍攝。封路係唔係大陣仗得滯呢？據一位自溫哥華回流嘅老友講：「一啲都唔奇吖，溫哥華就幾乎日日封路畀電影公司拍戲。」只要唔係過份阻礙交通及正常生活，封路拍戲可以促進創意工業發展，我哋冇乜理由反對。早上凌晨最受影響嘅，相信係中環報販，每日七點前，大道中係報販世界，送報紙貨車隨街泊，報販報紙佔領半條街，其他活動一概暫時讓開，如果佢哋唔投訴蝙蝠俠之拍攝工作，邊度會有人去投訴吖。
外國人監製嘅攝影工作，十分有效率，有在中環中心工作嘅新城電台記者報料，成個中環廣場地面在朝早六點前，凌亂一片，貨車、外景車充斥，但係未夠七點，已經恢復原來面貌，地面十分亁淨，之不過，一樓商場嘅廁所就比平時污糟，做到啲清潔阿嬸索氣。好難講咯，二三百人用一個廁所，唔搞到亂龍，已算啲外景及攝製人員有秩序，保持冷靜。
反而士氣散散哋（有人話已經散晒）嘅香港電台就不覺意之間失去冷靜作風嘞。紫微楊免費為香港電台批風水，在專欄指港台的是非不斷，風水壞極。估唔到講完之後，平時做事好有秩序，絕無失拖嘅港台新聞部竟然播錯新聞報道，令聽眾驚奇。十一月十三日星期二港台正午十二時新聞，約近十二時十五分之際，講阿仙奴贏雷丁三比一，當然係啱嘅，但緊接着播帶，竟然係十一月九日星期五嘅歐洲足協盃賽果，早已播過啦，做乜事擺烏龍喺十一月十三日重播一次？當然係編輯一時大意之過。港台新聞素來嚴謹過人，公信力高，呢次大意出錯，係唔係港台內部人心渙散，署理處長鎮唔住呢？電台影響力幾大吓㗎，喺陸羽飲早茶聽見鄭大班慨嘆，做議員冇人畀面，昔日揸咪就好多人同佢老友稱兄道弟。問佢點解咁大感觸，佢話留番選舉後先至講，他日退休，一定出本書盡吐心中情。