小妹遇到啲消費陷阱，都會同消委會嘅老友呻吓。今次風水輪流轉，老友走嚟同小妹呻返轉頭。老友話，消委會上期有關食物含反式脂肪嘅報告出版咗之後，報章出現咗啲大賣油炸鬼不含膽固醇、反式脂肪含量近乎零嘅廣告，表示可健康食用。
老友話，睇到呢啲廣告真係嘩嘩聲，咁嘅推斷係不恰當，廣告冇指出研究都有發現油炸鬼樣本嘅脂肪總量，每條22克至34克。根據世衞同糧農組織嘅建議，每日總脂肪攝入量應該係每天熱量攝入量嘅15%至30%。就以每天攝取2,000卡熱量嘅人為例，佢每日總脂肪攝入限量為66.7克。食一條油炸鬼，攝取嘅總脂肪量可能已達每日建議限量嘅三至五成。
老友仲話，油炸食品可能含致癌物丙烯酰胺，按以往測試，一條油炸鬼平均含7.4微克丙烯酰胺。含量唔算高，但世衞同糧農組織都建議盡量減低丙烯酰胺嘅攝入量。咁你話油炸鬼係咪好似廣告咁講，可以健康食用？
逢周一至周四刊出