以往戰國七雄分天下不復再，勢估唔到意甲醜事接二連三發生，頓令局勢變成「七國咁亂」，日前意大利國家隊長兼06雙料足球先生簡拿華路，突吐「肺腑之言」：「好彩我喺西甲踢波啫！」係咪真心風涼無人知，但呢鋪「大簡」想回國落班都幾難喇。
「意甲滿目瘡痍，我非常慶幸如今喺國外踢波，起碼啲細路入場睇波唔怕俾人襲擊，而且睇波睇到冇命我覺得真係好荒謬。」現效力西甲皇家馬德里嘅「大簡」，語重心長回應近期祖國發生嘅暴力事件，「以往喺意大利操練時，俾狂迷騷擾嘅情況仍歷歷在目，我覺得國內球迷同球會嘅利益關係應有所改變。」
言者也許無心，但旁人聽在耳內，總覺得身為國家隊隊長，一年前假波案後已經跳船走佬，家吓講番話涼颼颼，不免惹來非議，可憐「細簡」仲踢緊意甲拿玻里，唔知佢聽到嘅話，會否同大佬反目呢？
國米、羅馬12.5補賽
有地位講嘢嘅人梗唔止「大簡」一個，意大利名宿李華亦為窘境提供建議：「現時國內好似打緊『內戰』，球迷嘅舉動同恐怖主義無異；假如聯賽停戰1年，係有效打擊恐怖主義，不妨試一試。」
然而，意足總唔多理名宿意見，已計劃喺11月24日恢復聯賽，換言之意甲賽期並無影響，此舉可會係息事寧人嗎？至於補賽安排方面，國米主場鬥拉素，同埋羅馬主場硬撼卡利亞里嘅聯賽，將於12月5日進行，惟AC同阿特蘭大呢場至今未有定案。
意甲大亂，唔止國內球會失失慌，連曼聯亦騰騰震，事關12月12日歐聯作客羅馬，已有1,800名紅魔迷訂飛，但球會怕自己友遭狂迷「暗戰」，現時搵緊意足總、歐洲足協等當局諮詢意見，希望力保球迷嘅人身安全。究竟多事之秋何時了？求大俠都係想睇波啫！