家是世上唯一隱藏人缺點和失敗的地方，同時也蘊藏着甜蜜與愛。
──英國劇作家蕭伯納
一個家，要收藏的東西又點止這麼少，獻醜不如藏拙，家中濕碎雜物攤出來有礙觀瞻，當然要收起，絕不可輕易外露。今日來到灣仔會景閣的單位，完全明白了這個道理，一屋機關，為的就是將零碎小物中的私隱絕密收藏，不過所有算盡的「機關」，原來皆因由潔癖而起，果真用心良苦！
記者：葉雪芯
攝影：梁細權
Model：Mathew、Janify@puremodels
鳴謝：CliftonLeungDesignWorkshop（31068384）
JamesBondHouse
來到灣仔會景閣這個八百多呎的單位，一入屋，只見梳化、茶几、睡床，其餘空無一物，名副其實是窗明几淨。是示範單位嗎？心中冒起疑問的同時，室內設計師Clifton已經解釋：「入伙已有一年多，呢間屋有好多機關㗎！電視、DVD機、窗簾、電腦、冷氣機，全部齊晒，不過只係收埋晒啫。」有這個設計，皆因屋主有嚴重潔癖：「屋主是外籍人士，因經常周圍飛不在家，而佢本身好重視亁淨，要求一塵不染，即使有工人定時上門清潔都唔夠。既然係咁，我哋索性用入牆櫃將雜物收起，浴室、書枱、衣物、影音設備等全部隱藏在櫃裏，盡量做到平面空間多一點，感覺更簡單，更易打理。即使佢因工作關係成日唔喺屋企，都唔怕物品封晒塵。」
1.設計師以地板分開浴室和廳，一邊用木地板，一邊則用石地板。
2.要分隔睡房和客廳，全靠這一道薄紗。
3.浴室最多雜物，裝上入牆趟櫃，一樽樽的個人物品便收得密實。
4.書枱仿照鋼琴設計，掀起蓋，內有亁坤，電腦、文具、雜誌等全收納在此。
5.屋主不煮食，只保留電爐和水煲以備不時之需。天花的全是冷氣風口位，可調校出風角度。
遙控影音升降
屋主亦有要求家居盡量要表現得現代化，所以Clifton就加入大量「機關」，全智能式，以遙控控制，包括客廳中的影音櫃，就用遙控升降；還有Projector電視機和窗簾，均用遙控從天花吊下，所以一些到訪過此屋的人索性稱它為JamesBondHouse。
6.屋主用了ProjectorTV，看時螢幕會從天花降下，夠hi-tech。
7.廳中的矮櫃設有遙控升降櫃，影音設備藏身其中。
打通客廳睡房
搞咁多機關，又要咁多入牆櫃，一屋的「裝身費」應該唔平喇啩，果然不出所料：「裝修費的確比較貴，差不多400萬，亦費時3個多月。不過貴並不是因為入牆櫃和機關，而是單位結構重新調整過的關係。屋主只得一個人居住，所以不需要太多的間隔，而且佢亦希望空間感大，所以決定拆掉屋中的唯一一幅牆，將客廳和睡房打通，只用紗簾作分隔。我哋亦將廚房搬出廳，變成開放式廚房，原先的廚房改為雜物房，這個改動須要重新改造水喉位。冷氣機亦用鑲入式，冷氣槽鑲入天花中，改成可轉動方向的特色設計風口位，這兩方面的工程費頗貴。」
8.要hip又點少得designerchair：EamesWireChairbyCharlesEames（左，約$6,300）StoolOnebyKonstantinGrcic（右，約$2,699）
9.洗手盆本設於浴室中，但由於空間有限，惟有將喉位移至浴室外。
烏木地板耐濕熱
另外，在用料方面，Clifton都花了不少心思，例如烏木（又稱黑檀木）地板，木材來自熱帶森林的樹木，耐熱耐濕，好適合香港的潮濕天氣，遇濕都唔易凸起。這種木地板在香港比較少見，所以價錢會比一般的柚木地板貴一半。廚櫃和睡房的組合櫃都用了全實橡木，另外又焗了較深顏色，Clifton說單是這些木材用料已經佔了費用的1/3了。
自製望海窗台
單位的改動比屋主的原意多，Clifton說：「屋主原先想採用瑞典式木家具、淺色系，但同佢傾咗一陣，就發現佢係對生活要求好高，對亁淨有嚴格要求，但接受新事物的程度又好高，所以我就不妨用一些大膽啲嘅設計，改成hipstyle，例如深淺色的大對比、在家中添置designerchair等。」
Clifton謂屋主最滿意是窗台設計。最初單位是沒有窗台，但屋主經常在家舉行私人party，怕朋友太多唔夠位坐，所以特別要求用插了鋼筋的木板，再鋪水泥做窗台，讓朋友可以坐在窗邊看海景。「我亦刻意在窗邊加上兩面玻璃鏡，咁無論坐左邊或右邊，都可靠鏡嘅反射將維港海景盡收眼簾。」
家居有太大間隔改動，對風水會唔會影響好大呢？風水師方海閱說，時下不少人都會改動牆身配合室內設計，這是無可厚非，對風水亦影響不大，只要選擇適合裝修的時間和日子便可。
