港股周二果然單日轉向，噚日一升，又進賬超過1300點，周二低位26952，初步可確認係底。
恒指回升，噚日早市已大升逾千點，午後有力再升多200多點，上升力度明顯好強，亦證明調整嘅底部已經出現，短期會再衝一段，去到30000點水平先再回一回，理論上係會再試底部支持，但個人認為唔會落到咁低，恒指在28000至29000點整固完成後，可再上試高位。
中資同國企股反彈個勢亦好急，H指高收17837，大升1142點，升幅6.4%，大價股以中遠（1919）同聯想（992）最勁，升幅都超過14%；中交建（1800）、江西銅業（358）同中移動（941）等亦有近10%進賬。
升勢有成交配合
細價中資股好多亦發力，消息指華潤勵致（1193）會有大動作，明年股價有機會升一至兩個開。華潤勵致噚日收1.57元，升0.12元，升幅8.2%，成交比前倍增，睇勢都似有料到。
今年4月中，市場已有消息話華潤勵致業務會重組，其後兩個多月，股價由0.80元反覆升到上1.71元才停步，跟住的4個多月，走勢形成大圓底（低位1元），呢個係典型嘅收集形態，近日升番上高位，若衝破1.60元頂部阻力，以量度升幅計，初步上升目標係2.20元。
本月初，華潤勵致同華潤上華（597）聯合公佈，正進行業務重組，可能導致兩間公司的半導體業務合併，由一間上市公司經營。華潤勵致原本經營兩大項業務，但今年中已把空調壓縮機業務出售，套現11.7億元，獲利6300多萬元，以集中資源發展半導體業務。
正進行業務重組
華潤勵致現時持有華潤上華72.65%權益，兩公司業務合併，對雙方都有利，而合併後，華潤勵致將會有更大的活動空間，有消息指母公司華潤集團（持有70%權益）會將華潤勵致再壯大，唔排除會進行極具爆炸性的注資行動。
華潤勵致現時市值約44億元，半導體業務一年可帶來2至3億元利潤，若注資真的落實，股價實在可以倍升。