噚日會德豐（020）提出私有化Joyce（647），Joyce點解冇咗JoyceMa之謎終於解開。除咗Joyce，噚日仲有另一隻引人注目嘅服裝股，就係邱淑貞老公沈嘉偉揸fit嘅I.T（999），隻股噚日收報2.76銀，升咗22.67%，所以喺網上討論區，有網友將佢同藍籌服裝股思捷環球（330）比較。不過單睇股價同市值，兩隻相差仲好遠。
當年I.T上市，已經有人將佢同思捷比，無他嘅，I.T老闆沈嘉偉，同思捷老闆邢李㷧有個共通點，就係都有個靚老婆。邢李㷧配大美人林青霞，沈嘉偉就有邱淑貞；無獨有偶，八卦新聞話兩位老闆都想老婆同佢追番個仔，但青霞同淑貞生咗兩個都係囡囡，不過邱淑貞先前傳聞話有喜，今鋪I.T股價勁升，唔通係「喜兆」？
招股價同為1.95元
仲有沈嘉偉同邢李㷧都咁錫老婆，沈生一早已經將I.T嘅股份送畀老婆，邱淑貞間接持有8.1%嘅I.T，價值2.3億港銀。至於邢李㷧點錫老婆，唔使多講，睇佢同青霞嗰兩個寶貝女個名，大家就明晒啦！嗱，錫老婆真係會發達㗎！
除咗大家都娶咗演藝界美人，沈嘉偉同邢李㷧出身都相似，都係白手興家，仲有原來I.T同思捷嘅招股價都係1.95元，巧合啩！不過，講到股價同市值，思捷就大大拋離I.T，思捷早喺02年就晉身藍籌股，呢幾年股價係咁升，家陣成116.9蚊，市值1440億銀，比I.T嘅2.76銀股價同28.7億銀市值，簡直蚊髀同牛髀，拋離成條街，沈嘉偉睇怕要踩行油嚟追。
服裝股昨日表現
股票：I.T（999）
收市價（元）：2.76 變幅（%）：22.67
股票：GayGiano（686）
收市價（元）：2.38 變幅（%）：19.00
股票：包浩斯（483）
收市價（元）：1.72 變幅（%）：10.97
股票：佐丹奴（709）
收市價（元）：4.03 變幅（%）：4.13
股票：佑威（627）
收市價（元）：0.32 變幅（%）：3.28
股票：堡獅龍（592）
收市價（元）：0.38 變幅（%）：2.74
股票：威高（1173）
收市價（元）：0.24 變幅（%）：2.10
股票：思捷（330）
收市價（元）：116.90 變幅（%）：0.43
股票：德永佳（321）
收市價（元）：6.12 變幅（%）：0.33
股票：慕詩（130）
收市價（元）：2.44 變幅（%）：-2.40
服裝股要升靠轉型
沈嘉偉嘅I.T今年好生性，跑贏一眾服裝股，年初至今升咗1.2倍，邢生嘅思捷都只係錄得35%升幅，至於其他對手好似慕詩（130）同包浩斯（483），只係分別升15%同29%。不過，I.T點升都唔夠另一隻服裝股GayGiano（686）咁誇，噚日晏晝復牌，最多升咗40%，雖然收市報2.38蚊，升幅唔夠I.T咁勁，但全年嚟計，升咗16倍，係眾多服裝股之冠。
不過，GayGiano升並唔係因為賣衫，而係轉型做礦。如果沈嘉偉想跑贏邢李㷧，不妨諗諗做埋礦呢瓣生意。信華華，諗吓都可能剌激到股價㗎！
internetforum
網友寄予厚望
I.T股價勁升，唔少散戶網友寄予厚望，Over1281話：「I.T爆升中，慢吓手係第二隻思捷。」不過，JoJo就話：「將佢同思捷比，股價爭咁遠，唔係吓嘩！」
隻股做唔做到思捷第二要睇長線，但噚日勁升就係事實，Happyma諗：「股價升得咁犀利，會唔會就嚟冬天，多咗人換季刺激銷量，幫助股價？」Evildude就估：「會唔會關內地消費股概念事？佢早排收購咗內地零售業務。」其實今時今日嘅散戶已經好醒目，好似My3216668就指：「係因為佢俾大行調高目標價到3.15元，給予『買入』投資評級，咪刺激股價囉！」
布雷狄加123亦睇好I.T：「佢走勢唔錯，收購內地零售，又搞高檔百貨，之前都升緊，只係咁啱遇到跌市，先至回小小，喺2.37元入咗一手，小試牛刀，有錢就再加碼，越升越買。」但I.T.次子就較為小心：「咁樣升法，要小心掃高批股喎。」
電郵：mailto:[email protected]