瑞銀策略員陸東睇股市出名準，有基金界股神美譽。今年已經多次準確預測港股升跌。除咗預測股市準，陸東睇樓一樣掂，近排樓市升，原來陸東今年6月已經行動，用咗6400萬銀買西貢飛鵝山莊7號屋。華華睇番佢過去17年嘅物業投資紀錄，戰績彪炳，炒樓進賬1747萬銀，現持有嘅物業升值兩成八，賬面勁賺2515萬。
陸東舊年底，除咗唱好香港地產股，仲睇好物業市道。事實上，唔少地產代理都承認，好多大陸資金落嚟炒樓。既然睇好樓市，陸東亦身體力行，今年6月28號用咗6400萬銀，買西貢飛鵝山莊7號屋，大屋面積4530方呎，仲有過萬方呎花園。
據地產代理話，飛鵝山莊早幾日先至有個雙號屋成交，同陸東嗰間size一樣，成交價7480萬，用呢個價計，短短4個半月，陸東層物業就升值17%，賬面獲利1080萬銀。
投資物業贏多輸少
陸東曾經講，「睇樓好簡單，最主要係反群眾，唔好俾雜音影響到，同埋睇租金、息口走勢，當然唔係話要最低位買入，最高位沽貨，但要捕捉大浪並唔難。」據聞，陸東人生第一次買樓，係六四事件後，果然係反群眾人棄我取。
不過，陸東亦有失手，95年以655萬買入嘅西半山高雲臺，持貨12年，今年5月蝕讓離場。家陣陸東住緊嘅中半山嘉富麗苑，亦喺97年2月以2350萬銀買入，不過聽地產代理講，𠵱家個單位值3500萬銀，升值近五成。
陸東都有投資寫字樓，02年吼中上環海景商業大廈銀主貨，地產代理話家陣嗰度呎價4000至4500，佢個物業6年升值2.2倍。
陸東現持有的投資物業
‧中半山梅道嘉富麗苑高層
買入日期：02/97 買入價：2350萬
現估值：3500萬 升值：1150萬
‧上環干諾道西海景商業大廈中層
買入日期：01/02 買入價：130萬
現估值：415萬 升值：285萬
‧西貢飛鵝山莊7號屋
買入日期：06/07 買入價：6400萬
現估值：7480萬 升值：1080萬
資料來源：土地註冊處及地產代理
賬面賺2515萬
陸東投資物業回報
‧西半山旭龢道福苑2座高層
買入日期：07/91 賣出日期：09/92
賣出價：590萬 回報：賺191萬
‧山頂種植道維景山莊地下
買入日期：08/93 賣出日期：01/97
賣出價：1370萬 回報：賺535萬
‧西半山干德道君德閣高層
買入日期：04/94 賣出日期：04/97
賣出價：955萬 回報：賺369萬
‧西半山西摩道高雲臺高層
買入日期：09/95 賣出日期：05/07
賣出價：620萬 回報：蝕35萬
‧西半山羅便臣道雍景臺1座高層
買入日期：12/01 賣出日期：01/07
賣出價：1250萬 回報：賺280萬
‧灣仔星街星域軒1座中層
買入日期：06/02 賣出日期：05/06
賣出價：1200萬 回報：賺407萬
資料來源：土地註冊處
總回報：賺1747萬
兩度蟬聯最佳港股分析員
陸東𠵱家係瑞銀投資研究部董事總經理兼港股策略員，佢00年出任瑞銀香港區嘅研究部主管，01到03年，被《亞洲貨幣》財經雜誌選為最佳港股分析員。02同03年，帶領嘅證券研究部就被國際財經雜誌《機構投資者》選為冠軍。
加入瑞銀之前，陸東曾經喺恒生銀行（011）投資部工作，84年過檔岳少嘅麗新（488），擔任投資經理，一做就10年。跟住轉去保誠資產管理，做咗6年基金經理。
陸東先祖陸潤卿，係廣東銀行創辦人，利孝和夫人陸雁群係佢姑姐，堂兄陸楷係莎莎國際（178）首席財務總監同執行董事。
瑞銀點只一個明星
瑞銀嘅星級分析員除咗陸東，仲有一個響噹噹嘅名字──林奮強，不過𠵱家佢已經由「sell-side」轉做「buy-side」，家吓職位係瑞銀環球資產管理（香港）董事總經理，佢97年加入瑞銀，98年起，連續3屆獲《機構投資者》雜誌選為最佳地產分析員，係繼卓百德之後，雄踞最佳地產分析員日子最耐嘅人馬。
林奮強嘅代表作，係97年回歸冇耐，率先預測樓價半年內跌超過三成，當時個市炒到㷫烚烚，邊度會有人信個市會冧，點知中晒，林奮強一炮而紅。到咗03年，沙士過後香港人信心盡失，佢預言住宅樓價可以喺04至05年升五成，結果又中。
林奮強睇中樓市，自己亦有投資其中，好似𠵱家hit爆嘅九龍站，林奮強就係長期捧場客，據悉佢最少揸住6個擎天半島單位長線投資，當中唔少係04年初買入。
mailto:[email protected]
