有基金界股神之稱嘅瑞銀策略員陸東，今年已經多次貼中港股走勢，好似5月時話恒指見兩萬三，中！上個月底發表報告話恒指會急跌4000點，又中！
日前，佢再發表報告，今次玩得仲大，話睇恒指明年見四萬二。中唔中？未咁快開估，但華華就幾肯定，陸東近排應該好忙。點解？一般散戶可能唔知，陸東好鍾意喺每份報告封面登一張龜相，次次唔同，令收到嘅投資者有唔同聯想，不過，新鮮出爐嗰份報告，封面張相居然用番5月22號份報告嗰張，唔通陸東今次份報告另藏玄機？
華華睇番5月份報告，陸東當時「預言」港股牛市有排都未完，繼續維持07年恒指見23000點，結果當時恒指由20843點，短短5個月，就升超過1萬點，上月尾曾高見收報31638點。
而陸東今次喺跌市之後發表嘅報告，就「預言」調高恒指明年目標至32000點，最樂觀更升到42000點用呢幅龜圖嚟預測，以噚日收市29166點，5個月後，即明年4月中，港股升1萬點，就去到39166點，再多少少日子咪見42000點囉！