無綫總經理陳志雲主持嘅《志雲飯局》，噚日請咗曾經喺無綫做咗19年嘅吳雨做嘉賓，兩個人喺圓方一間日本料理餐廳做訪問，𠵱家吳雨係英皇娛樂集團行政總裁，佢喺節目中講到好多女星為求上位而投懷送抱。
嘆明星日少
吳雨話當年仲係單身，去到有錢同有地位時，雖然自己個樣醜，但係依然有好多女藝人想做佢女朋友，藉佢權力上位，吳雨話在位要識好好控制，佢都有教手下要小心處理權力，佢回想當年畀咗個哪吒角色陳儀馨反串，而放棄搵阮兆輝，搞到同事話佢同陳儀馨有路，佢話：「事實勝於雄辯，最終陳儀馨稱職演出，其他人毋須多講。」
吳雨直斥無綫現時製作缺乏創意，冇紅星撐場，出現斷層，佢話：「當年台慶同東華騷，大牌司儀例如汪明荃、沈殿霞、鄭裕玲，多到要爭位企、爭講一句對白，最終要擺何守信喺中間，而當年劉德華、梁朝偉亦只係後排嘅小嘍囉。」吳雨又話有實力嘅人點都㩒唔住，當年佢花咗兩個鐘要求初出道嘅周星馳做《歡樂今宵》，但係周星馳話要做話劇，唔肯遵從，最終將佢調去做兒童節目，但係佢依然有今日嘅成就。