獲愛情滋潤但仍消瘦的李嘉欣，惹來男友許晉亨投訴似「排骨」後，近期成功增磅。她前晚出席Valentino新店活動後，透露自己是一個愛規劃人生的人，雖然曾表示不會結婚生子，但現時受男友影響，改變人生計劃。
意國品牌Valentino在中環置地開設旗艦店，特別由意大利運來八件、共值1,000萬元的ValentinoCouture作展覽。前晚開幕酒會上，李嘉欣以一身Cruise新裝、佩戴男友許晉亨送的鑽石手鏈亮相，問她珍藏多少Valentino？她說：「唔係儲咗好多，最記得嗰時初初入行，去到LA入咗三條Valentino晚裝，當時冇乜儲蓄，覺得係好大投資，到𠵱家我間中都會拎出嚟試吓、着吓。」
男友投訴太瘦
劉鑾雄曾指嘉欣是圈中富婆，相信當年她都花費得起？嘉欣對此說：「我𠵱家都唔係富婆，我喺衫方面唔會花太多錢。」問可會將三件Valentino珍藏留待結婚用？她甜笑說：「可能啦，不過當年身形圓潤啲，𠵱家條裙有啲鬆，仲有人投訴我太排骨。」是否男友投訴？她說：「係呀，佢擔心我健康有問題，叫我食多啲嘢。」莫非做許晉亨女友壓力大？她說：「唔會，我好開心，我個人冇乜壓力。」
談到Mr.Valentino將於明年一月退休，若要Valentino訂做婚紗，則要趕快，嘉欣說：「我對衣服同人生，每方面都有計劃，唔會特別趕，到時會通知大家。」
人生不斷改變
過去嘉欣曾公開表示人生沒有計劃要結婚生子，對此她說：「你哋冇記錯，不過今日可能係planA，明天可能係planB，之後都可能係C、D、E、F、G，會改變。」男友令你改變計劃？她說：「一定會有改變。」愛計劃人生的她，又謂正計劃一個白色聖誕。
採訪：RitaLeung
攝影：MatthewLam
