花旗股市跌咗幾日，終於出現顯著反彈，昨日港股梗係唔放過反彈嘅機會，一升就係1362點，由頭升到尾。不過，成交唔夠1500億，有乜啓示？好簡單，局勢未定，股民成手都係蟹貨，梗係睇定先，一個唔覺意花旗股市跌番轉頭，點算？恒指反彈阻力喺22650至30000之間，貨多就要睇位減持，恒指若回頭跌穿28000，反彈結束。
國企股昨日都大力掃番轉頭，不過國內呢個禮拜六好大機會加息，持股過周末要小心啲，加息對保險股係正面因素，短炒一於買保險股，咁多隻走勢最靚就係國壽（2628）。
國壽C輪5674：國壽昨收45.75元，重返50日線，技術指標轉好，先上試49元，破位睇51元，可以買啲C輪5674，隻輪昨收78仙，槓桿率5.8倍（有效4.5倍），對冲值0.76。正股升上49元同51元，5674應該喺1.04同1.21元樓上，正股跌穿43.4元止蝕。