日本賓架Y先生調回東京後，已經成兩年幾，最近來港一行，搵埋左丁山食餐晚飯，六點半在「留園雅叙」見面。左丁山一時失魂，搭十一號巴士唔記得落車，去到駱克道市政大廈先至落，於是行番轉頭，行成兩百個門牌，行到索氣而遲大到。黃昏時候，駱克道啲酒吧已開始熱鬧，左丁山沿途碰到唔少穿着deepV上衣嘅女郎，一望而知係貌似來自菲律賓嘅女士。自以為外傭先至多菲律賓女士啫，究竟酒吧女郎為何咁多菲律賓同胞？佢哋憑乜嘢簽證來港工作？真係想問吓移民局。
最近灣仔名酒店發生命案，兩名美國男士帶貌似菲律賓女人回房後，嘈到拆天，次日發覺魂歸天國，似係食藥過多而死。據酒店界人士同左丁山講，好多外國男士一到酒店checkin之後，就會去駱克道或謝斐道蒲吧，攜同貌似菲律賓女士回房，有時甚至一個拖幾個。亞洲酒店之中，香港啲酒店最注重人權，十一點前唔會要求人客留低人名。至於啲外籍人士次日向酒店投訴唔見咗黑莓、iphone、手機，荷包之類，酒店嘅標準回應係：「我哋可以代你報警，請你詳述昨晚幾點到幾點嘅活動，寫一份statement，等香港警察追查。」啲男遊客聽到，多數會話：「算嘞，算嘞，你哋酒店好麻煩。」佢哋邊度敢報警吖，一有正式紀錄，佢哋返到鄉下唔俾公司開除都會俾老婆追究呀。
好不容易行到「留園雅叙」，賓架Y等人已經坐齊晒響度，唯有猛講「鎖你，鎖你」，仲俾賓架Y笑係唔係先在駱克道酒吧飲咗一杯先。賓架Y位年青下屬原來識用普通話點菜，問佢點解，先知道佢來港前先去上海復旦大學讀中文一年。賓架Y講：「現在中國係亞洲嘅主導（dominating）國家，我個女在早稻田攻讀日本文學，選修一科語言，我卒之勸服咗佢放棄法文、德文，改為讀中文，𠵱家日本公司好需要識得中文英文嘅僱員，我哋下一代要讀好日英中三國語文，可惜唔係好多人讀得掂。」咁又係嘅，叫日本人學好英文，已經辛苦，要識埋中文，確實考功夫。香港人讀中英文比較容易，不妨讀埋日文吖。